QATAR.- E hefe di e departamento di spionahe di Israel lo mester a yega Qatar ayera den otro esfuerso pa yega na un akuerdo riba interkambio di rehennan ku ta den man Palestino na Gaza, ku ta kasi nuebe luna den e guera aki entre Israel i Hamas. Fuentenan a duna di konosé ku e delegashon enkabesá pa David Barnea, hefe di e servisio di inteligensia Mossad, a sali ku destino pa Emiratonan Arabe pa deliberashonnan ku e intenshon pa trese partidonan mas serka di un akuerdo na Gaza. E fuentenan a duna di konosé tambe ku Barnea lo reuní ku e mediadó prinsipal Promé Minister Mohammed bin Abdulrahman Al-Thani. Merka ku a bin ta traha huntu ku Qatar i Egipto pa trata di yega na un akuerdo, a duna di konosé ku e ta apresiá e desishon di Promé Minister Benjamin Netanyahu pa manda un delegashon.
Di otro banda, e ministerio di salubridat ku ta ser goberná dor di Hamas a duna di konosé ku por lo ménos 38.011 hende a pèrdè nan bida durante e guera di nuebe luna entre Israel i militantenan Palestino. E kantidat di morto ta inkluí por lo ménos 58 hende durante e último 24 ora, esei di akuerdo ku un deklarashon di e ministerio. Banda di tur esaki un kantidat di 87.445 hende a keda herida den e aria di Gaza for di dia ku e guera aki a start ku atake dje militantenan Palestino riba un multitut israelí dia 7 di òktober 2023.
