WASHINGTON, MERKA, AFP.- E hefe di e grupo estadonan islámiko EI no a bringa bèk ayera na Siria den un atake merikano i a ofresé e chèns pa e entregá, asina un general merikano a bisa.
“Haji Abdullah no a bringa bèk”, asina general Kenneth McKenzie hefe di e komando sentral di Merka a bisa, usando un di e diferente nòmbernan di Abu Ibrahim al Hashimi al Qurashi.
“El a mata su mes i su famia di mas yegá sin bringa bèk, inkluso el a trata na entregá i nos a ofresé un salida pa sobrebibí”, asina e militar a bisa den un konferensia di prensa.
Rusia a bisa ku e ta apoyá e akshonnan antiterorista di Merka despues di morto di e hefe di estadonan islámiko den un bombardeo merikano na Siria, asina e kansier ruso a bisa den un komunikado ku por sierto ta un kontraste ku e situashon entre e dos paisnan pa Ukrania.
“Nos ta apoyá e esfuersonan di otro paisnan, inkluyendo di e miembronan di e koalishon dirigí pa Merka na Siria den área antiterorista”, asina e komunikado ruso ta bisa, ku tambe a pidi un investigashon a fondo riba e eventual víktimanan sivil den e bombardeo ei.
E dokumento ta enfatisá ku Rusia ta dispuesto na kooperá ku tur pais interesá den un kontesta konhunto i efektivo kontra di e menasa komun di terorismo.
