Michele Sensi-Contgi, hefe di inteligensia di Ecuador, kende a pèrdè su bida den aksidente aereo na Kenia.
NAIROBI, Kenia (AFP).- E hefe di inteligensia di Ecuador, su kasá i otro sinku persona a pèrdè nan bida den un aksidente di un helikòpter ku kai den sentro di Kenia na momentu ku e tabata transportá turistanan.
E helikòpter a lanta buelo for di e reserva natural di Loisaba i a kai den e zona di Monte Ololkwe, na 250 km nort di Nairobi.
Imágennan kompartí riba X a mustra e sobrá dje helikòpter tur na kandela i huma pretu ta bai haltu for di sitio dje aksidente.
“A suspendé e operashonnan te awe mainta debí na skuridat i e situashon hopi difísil dje área”, segun David Nkoroi, hefe di polis dje region di Samburu, na e sitio dje aksidente.
Entre esnan ku a pèrdè nan bida ta figurá e hefe di inteligensia di Ecuador, Michele Sensi-Contgi, i su kasá.
“Awe ta un dia hopi tristu i doloroso. Tin momentunan ku palabra no ta sufisiente pa splika un pèrdida asina direpente”, segun e vise presidente ekuatoriano Maria Jose Pinto.
Seis pasahero i e piloto tabata den e e helikòpter. Sinku dje personanan ta norteamerikano.
