CARACAS, AP.- E hefe di Asamblea Nashonal a mustra dispuesto na asumí presidensia di Venezuela, despues di akusá mandatario Nicolás Maduro komo un “usurpado”.
Juan Guaido a afirmá ku e ta dispuesto na asumí e “kompetenshanan komo presidente pasó ta esaki ta loke nos konstitushon ta stipulá”. Pero el a agregá ku e pueblo, forsa armá i e komunidat internashonal mester disidí ken mester okupá e puesto.
E deklarashon di Guaido a wòrdu respaldá pa e sekretario general di Organisashon di Estadonan di Amérika, Luis Almagro i a agregá ku “e tin nos sosten, i esun di e komunidat internashonal i di e pueblo di Venezuela”.
Durante su reunion ku opositornan, Guaido a hasi un yamada na forsa armá pa no rekonosé Maduro komo presidente.
Míles di opositor a konsentrá dilanti ofisina di Programa di Nashon Uní pa Desaroyo na ost di Caracas, pa partisipá den un protesta organisá pa Asamblea Nashonal, kontrolá pa oposishon.
Maduro, di 56 aña a huramentá komo presidente pa su segundo mandato di seis aña dilanti di Tribunal Supremo di Hustisia, kontrolá pa ofisialismo. Konstitushon ta obligá presidente pa hura dilanti di Asamblea Nashonal.
