NASHONNAN UNI, USA.- “Nada ta hustifiká e kastigu kolektivo” di Israel kontra e poblashon palestino den Gaza, ku ta pasando un sufrimentu “inimaginabel”, segun a keda denunsiá pa e sekretario general di Nashonnan Uní den entrevista ku AFP.
“No por imaginá e nivel di sufrimentu den Gaza, e nivel di mortonan i di destrukshon no tin nada pa kompará ku loke m’a presensiá for di despues di a bira sekretario general for di kuminsamentu di 2018”, segun Antonio Guterres.
“No tin duda, nos ta kondená tur e atakenan terorista di Hamás, komo tambe e toma di rehennan, ku ta un violashon kompleto di derechi internashonal humanitario”, segun el a presisá. “Pero bèrdat ta ku nada por hustifiká e kastigu kolektivo dje pueblo palestino, i esei ta loke nos ta mirando di forma dramátiko den Gaza”, segun el a agregá refiriendo na e destrukshon, hamber i enfermedatnan ku ta plamando den e teritorio.
For di despues ku e guera a start, e atakenan israelí den teritorio di Gaza a kondusí na morto di 41.226 persona. Huntu ku esei, mas di 200 trahadó humanitario, den mayoria di Nashonnan Uní, tambe a pèrdè nan bida.
E hefe di Nashonnan Uní mas aleu a rekonosé “violashonnan serio” di parti di tantu Israel komo Hamás
Ku e situashon aktual, e hefe di Nashonnan Uní ta mantené su petishon pa stòp ku e guera, pero e negosiashonnan ku embolbimentu di Merka, Catar i Egipto ta morto, miéntras ku tantu Israel komo Hamás ta akusá otro di no ta interesá den un akuerdo.
Guterres ta mira ku ta “hopi difísil” pa yega na un akuerdo, mirando ku e promé minister israelí, Benjamin Netanyahu, for di luna di òktober no ta respondé na su yamadanan.
