Dr. Tedros Adhanom Ghebreyesus (r), e direktor general di OMS den un kombersashon ku ofisialnan na momentu ku el a yega Kinshasa
KINSHASA, RD CONGO, AFP.- E direktor di e agensia di salú di ONU a biaha pa Repúblika Demokrátiko di Congo djaweps, den un muestra di sosten pa e pais afrikano miéntras esaki ta lucha kontra e último brote mortal di ébola.
“Huntu nos lo superá e brote aki”, asina Tedros Adhanom Ghebreyesus a bisa, kende ta direktor di Organisashon Mundial di Salú. El a publiká e mensahe riba X, dirigí na e pueblo di Congo.
OMS a registrá 10 morto konfirmá i 223 morto sospechoso di ébola na RDC desde ku a deklará e brote riba 12 di mei. Esaki ta entre mas ku 1.000 kaso konfirmá i sospechoso, segun e sifranan di mas resien di te ku 24 di mei.
OMS a atvertí ku e propagashon berdadero di e brote posiblemente ta muchu mas tantu ku e sifranan ofisial. Ekspertonan ta kere ku e vírùs a sirkulá sin ku a detektá esaki pa un tempu kaba.
Esaki ta e di diesshete brote di ébola den e pais di mas ku 100 mion persona.
Loke ta kompliká esfuersonan pa kombatí e brote ta e echo ku su episentro ta na ost, den un region marká pa violensia di gruponan armá ya pa mas ku tres dékada kaba.
