Presidente kolombiano Abelardo de la Espriella (meimei) i su Minister di Defensa Jorge Mora (di dos na man robes) kendenan ta djòin ku Merka den e pelea kontra di narkotráfiko.
BOGOTA (AFP).- Djárason e hefe di Southern Command di Merka a bishitá Colombia pa reuní ku e kabesantenan militar nobo nombrá pa e presidente Abelardo de la Espriella, flamante aliado di Donald Trump, den su strategia kontra di narkotráfiko den Amerika Latina.
E mandatario kolombiano, na poder for di 7 di ougùstùs, a primintí di ataká gruponan narkotrafikante ku mannan duru e i esaki ku yudansa di Washington.
Algun dia despues di e instalashon, Trump a agregá Colombia na e loke a keda yamá komo Eskudo di Amérika, e koalishon di komo binti pais di e region pa kombatí e mafianan di tráfiko di droga.
Djárason Southern Command a anunsiá e yegada di su komandante, e general Francis L. Donovan, na Bogotá, “pa reuní ku e lidernan militar nobo dje pais i diskutí esfuersonan konhunto pa kombatí narkoteroristanan”. Colombia “ta un sosio di hopi tempu den e lucha kontra di e gruponan i un lider vital den e seguridat nashonal” segun e komando, ku for di Florida ta koordiná e operashonnan militar di Merka pa Amérika Latina i Karibe.
Mas trempan De la Espriella a selebrá e seremonia di asenso dje tòp nobo ku a keda formá pa algun militar retirá durante dje gobièrnu di su antesesor, e iskierdista Gustavo Petro. Petro a hasi un kambio fuerte den e alto mandonan di forsanan militar i a promové un polítika di pas pa negoshá e desarme di forsanan militar ilegal den e pais.
De la Espriella a yega na poder ku e promesa di kibra e diálogonan ei i fortalesé e forsanan militar ku yudansa di Merka despues dje chokenan konstant en re Petro i Trump.
Washington tin intenshon pa destiná 1.000mion dòler pa seguridat den Colombia, e pais mayor produktor di kokaina na mundu.
