Helmin Wiels Jr.; “Ami ta trankil sabiendo ku mi a pordoná bu den bo kara.”

“Elvis Kuwas no ke pa mir’é komo héroe”

….5 di mei 2013, den oranan di atardi na Pir di Marie Pampun Kòrsou a keda sakudí ku likidashon/asesinato di lider polítiko i parlamentario Helmin Wiels. Di e fecha ei te awe kosnan a keda turbulento na Kòrsou. Kaso tras di kaso, mas likidashon ku a sigui, sospechoso ku ta mata kurpa den sèl di polis, kastigu di bida largu ta loke a keda zona den nos komunidat. Pero kon e famia a dil ku e morto aki. Kon e yunan a biba e momentunan for di despues di e asesinato te awe. Hustisia di Kòrsou tin e proyekto sosial restorativo i den e kuadro aki e famia, den e kaso aki e yunan di defuntu Helmin Wiels a i ta pasando aden. I sigur nan a logra pordoná e sospechoso ku a lòs e tirunan mortal riba Helmin Wiels.

 

Heiko de Jong, fiskal mayó

Den 2014, CBS a tene un asina yamá enkuesta di víktima (slachtoffer enquete). Ei den a bin a puntra riba e idea di Herstelrecht di víktimanan. Esei segun mr. Heiko de Jongh ta inkluí ku banda di e parti di lei represivo esta kastigu na esnan ku kometé krímen, tin un otro método tambe ku ta trese víktima i sospechonan huntu ku otro i pa solushoná e disputa. Banda di e sistema tradishonal di “vergeding” esta eksihí daño perhuisio tambe tin e parti di “vergeving” esta pordon. E idea ei na 2014 a sali n kla ku 64 porshento di esnan enkuesta a bisa ku nan ta mira posibilidat den un idea asina i ku na ta mir’é ku tin sentido pa e víktima i e sospechoso por papia ku otro i asta tres restorashon. Den pasado segun fiskal mayor de Jong, Ministerio Públiko a yega di eksperimentá ku e idea aki, pero e resultado di e enkuesta a duna nan un push pa finalmente nombra un komishon  ku diferente organisá huntu ku OM pa dun’é bida. I for di esei tin diferente kaso ku a keda solushoná i un di nan ta esun di asesinato di Helmin Wiels, kaminda e yunan a tene un kombersashon ku esun ku e tira riba Helmin Wiels i kousa su morto.

 

 

Helmin Wiels Jr.; “awor mi ta oké.”

Yu hòmber di eks lider polítiko i parlamentario asesiná Helmin Wiels, Helmin Wiels Jr., a relatá kon e kaso aki a afektá su bida. E ta kòrda 5 di mei 2013 a kambia su bida i di su famia kompleto. For di despues di e kaso, ora el a tende e tabata na trabou. El a sali trabou i yega kas i su mama a puntr’e si e ta OK i el a bisa ku su. Su prima tambe a bèl e i puntr’e meskos. E prima a duna e mama telefòn i ora el a sera telefòn a bisé ku el a tende ku su tata a risibí bala na Mari Pampun kaminda nan a lanta for di chikí. Loke Helmin Jr. tabata ke sa ta si su tata tabata na bida na e momentu ei. E ta kòrda su prima a bèl bèk i su mama a sak den otro i Helmin a komprondé. E tabata un shòk i sigur no tabata oké mas.

Despues di un siman nan a bin Kòrsou. E ku su ruman muhé ta bin haña nan den un situashon hopi ‘rumoerig’. Tur hende ta riba dje i nan no tabata prepará pa esei. Nan sa ku nan tata a hasi impakto mundial pero ora nan tabata aki nan a wak esei. Despues a sigui temporada masha difísil.

Tabatin diferente kaso den korte i Hemin Jr. tabata bai tur e kasonan. E último dosnan e no a bai pasobra e tabata rabiá ku sierto kos ku el a tende i mira den korte. Pero el a sigui tur e kasonan i e tin di kana su kaminda. E sa ku kos mester kana su kaminda.

 

Un dia lo yega un fin na e pesadia…

“Komo yu nos ta wak e otro. Komo yu bo tin purá pa e kaso keda solushoná. Pero miéntras e kosnan tabata kanando por komprondé ku e ta hopi delikado. Nos a bira mas trankil pasobra nos sa ku e kaso ta hopi delikado i Kòrsou ta chikí”, Helmin Wiels Jr. a bisa EXTRA.

E yu di Wiels ta spera ku un dia lo yega un fin na e pesadia aki. No solamente nan pero henter Kòrsou ta spera ku un dia lo yega na un solushon pa henter e kaso aki. Nan ta warda, asina el a bisa.

E doló no ta bai….

“E doló no ta bai. Bo ta tum’é dia pa dia. Nos ta papia hopi ami ku mi ruman. Nos tin hopi kontakto pero sana, e doló no ta bai i mi ta kere e preguntanan ku nos tabatin ora nos a drenta den un trayekto i mi ta kere despues di e  trayekto awor mi ta un tiki mas trankil. Tabatin algun pregunta ku mi tabatin i eseinan a keda kontestá. Di kon i kiko tabata bo meta òf bo no tabatin salida. El a kontestá i esei ta bon kla. Awe mi no ta papia ku e rabia di 6 aña pasá. Mi ta papia mas ‘rustig’ i trankil”.

 

Enkuentro ku Elvis Kuwas; tabata ‘heftig’…

Helmin Wiels Jr., i su ruman a topa ku  Elvis “Monster” Kuwas. Esaki a sosodé den presensia di Marelva Jansen-Liberia i tambe fiskal mayó. “Het was heftig”. “Pa nos tabata un efekto otro pasobra, nunka el a keda hasí. Ora mi tabata papia ku mi ruman i a bisé ku mi ta bai Ulanda el a puntra mi ku ta sigur ku mi ke bai. I mi a bisé ku mi ta hasié pa mi mes. Nan no a obligá nos pa hasié i nos kier a hasié 4 aña pasá kaba pero tur kos ta bin na su tempu i mi a pordon’é. Mi a bis’é den su kara ku ami por sigui mi bida trankil pasobra e rabia ku mi tabatin pe mi no tin e mas i pa mi mi ta oké. Mi sa ku no ta hopi hende por hasi loke ku nos a hasi. Ami ta trankil sabiendo ku mi a pordoná bu den bo kara”.

Pero no ta kla ainda. E trayekto ta sigui kana di e hustisia sosial restorativo. Helmin a bisa ku e echo ku e por a para den kara di Kuwas i bis’é ku e ta pordon’é tabata algu grandi pe. I e parti di pordon ta parti di e proyekto di sanashon.

Nunka Helmin Jr., a magin’é ku e lo tabata pará dilanti di Elvis Kuwas. Te awor aki e ta mustra manera algu ireal. I tin mas ku e ke para su dilanti ounke e no ta kla pa esaki ainda. Miéntras e kaso ta kana e lo wanta.

 

Nunka miedu….

I apesar ku tabatin mas morto a kai despues di e kaso di asesinato di Wiels i ku tabatin di aber ku Wiels, e yunan nunka tabatin miedu ku esaki lo bati na nan porta. Manera Helmin Jr. a bisa, nan a wòrdu kriá pa dos mayor stabil i a prepará nan pa tur kos. I nunka nan tabatin miedu pasobra nan ta hendenan di pueblo.

Loke ku Helmin ke bisa komunidat ku ke mira e solushon di e kaso aki ta pa tin pasenshi. Nan komo yu ta sintié hopi mas ku pueblo ta sintié i si nan por tin pasenshi, tur hende mester tin pasenshi. Tene pasenshi i tene pasenshi. I e emoshon di pueblo si nan no por kontrolá pasobra nan ta rabiá i tin derechi di ta rabiá pasobra nan komo famia tambe ta rabiá. E trayekto aki a bin ku tempu i nan a pasa over di dje. Pero tene pasenshi. El a dura un tiki pero e parti aki ta kla.

 

Marelva Jansen-Liberia; sikólogo di salú/konsehero di hustisia sosial restorativo i fasilitadó

Ta un trayekto hopi largu nos a kuminsá for di ora ku sr. Heiko de Jong tabata fiskal na 2001 ku fayesimentu di Nataly Francisca ku a lanta un fundashon i e tabata presidente. I for di e momentu ei nan a bisa ku mester bai restorá i e famia tambe tin di karga pasobra tabata algu masha doloroso. Pero den e kuadro ei a sigui. No tabata un trayekto fásil pasobra pueblo ni instansianan no tabata kla pe. Pero nan a sigui huntu ku Heiko de Jong ku ta fiskal mayó ku e ta bai un poko mas padilanti. E proyekto ta karga pa diferente instansia. E proseso restorativo nan a hasi mas aki. Tin mas kaso pero a kuminsá ku promové ku e kaso di Wiels. E hustisia sosial restorativo ta ku e ofensor ku a hasi un delito e tin di para ariba ku e ke restorá un situashon. El a hasi daño no na famia so pero na henter un komunidat. E tabatin posishon den komunidat komo parlamentario i esei a kousa basta rabia den komunidat. P’esei e hustisia sosial restorativo mester inspirá inovashon den nos hustisia. E parti di hustisia ta konta pa Wiels i su yunan i ta algu ku ta sosodé pafó di loke e víktima ta pasa aden. E ta sinta den korte i tende sentensia pero aki ta algu emoshonal i di kurason. E proyekto aki ta un hustisia real pasobra bo por partisipá manera bo ta i tin un kaminda di kana i ku kondishonnan.

 

Kondishonnan….

Algun di  kondishonnan ta ku mester tin un víktima pasobra e ofensor mester sinta ku e víktima. Einan e mester aseptá i atmití ku e delito a tuma lugá. E tin i asept’é i e ta tambe algu boluntario pa e víktima i e ofensor. Tur dos ta partisipá boluntarionan. “Nos no por obligá un hende pa hasi hustisia sosial restorativo”, asina sra. Jansen-Liberia a enfatisá. I banda di esaki e hende a bisa di a kometé e delito i ta aseptá pa karga e responsabilidat di restorashon. Di e forma aki bo ta bai kompartí informashon i informashon emoshonal ku otro. E víktima tin su preguntanan pa sa kiko a pasa den bo pa kometé e delito. I p’esei preguntanan ta importante i e ta algu kompletamente neutral. Ni hustisia ni niun hende ta partisipá. E ta hasi dor di konfiansa ku e hendenan ku a partisipá. Kuwas mes a pidi pa esaki pasobra e no por a biba kuné riba su konsenshi. E mes a pidi pa de Jongh ku e ke esaki i el a bisa tambe. Tin un parti di preparashon i den e proseso ei Kuwas a keda bisa ku e ke pa esaki tuma lugá pa kaba pasobra e no tin pas. E ta bisa di a asesiná un hende inosente ku e no tabata sa ta ken i e kos aki tabatin asina impakto riba komunidat. I nos tin di realisá, ken ami ta pa husg’é na momentu ku e pidi pa papia ku e famia/ i esaki ta konta pa e yunan tambe pa nan dil ku e situashon. E yunan a pensa esaki for di 4 aña pasá pero nan no tabata kla pe.

 

Método…

E yu muhé Savanah tabata basta rabiá ora algun aña pasá fiskal a papia kuné di e restorashon pero tòg e momentu a yega na febrüari 2019. I esei ta algu di aploudí. Esaki ta e método pa den kasonan ku tin delito ku e ta importante, pero e ta tambe pa kasonan komun. Den komunidat nos no ta restorá masha lihé i nos ta keda bai mianan i ku ta trese hopi doló den komunidat. I ku e programa aki ta pa e manera di trese trankilidat i pas i enfrentá e hende i hasié preguntanan direkto i di kurason. Pa asina e famia haña trankilidat.

Ministerio Públiko ke hasi uso di e método aki mas tantu posibel. I si tin kaso ta mèldu na e organisashon aki pa e mayor i yu restorativo. I ora kaba di e enkuentro no mag di divulgá kiko a papia na mesa. Tur hende ta papia den konfiansa i ta un plan di restorashon ta bin. Den e proseso tin e silensio total. Ta ei den e ta tuma lugá i ta ei den e ta keda. I ta esnan envolví mes mester papia kon nan ta sinti ku e método aki. Edatnan di kriminalidat ta baha i hóben mester haña chèns i e hustisia sosial mester tuma lugá.

 

Helmin Wiels Jr. ke papia ku hóbennan

Mi no ta interesá den polítika pero mi ke duna un man den hóbennan ku ta bai den kaminda robes, a yega momentu pa nos duna un tiki mas atenshon na e hende hòmbernan, e mucha hòmbernan di awendia. E mucha muhénan ta bon bezig pero e mucha hòmbernan den gang, den kriminalidat, nan no ke focus mas riba skol. Si hasi investigashon den skolnan por saka afó ku tiki hende hòmber ta kabando skol i esnan ku bai studia na Ulanda 70% ta stòp di bai skol. E bida na Ulanda ta asina fásil ku nan ta stòp di bai skol. Mi mensahe ta pa nan bin bei. Bin bei i ban pa nos kambia e pais aki i hasié un tiki mas positivo.

 

Elvis Kuwas lo bin ku un kansion

Pa sra. Marelva tabata un eksperensia grandi pasobra bo ta tende hopi loke hende ta bisa i di por a pordoná pasobra el a hasi impakto riba Kòrsou. Den e plan di restorashon kaminda Elvis Kuwas a bisa ku e ke reskatá hóbennan i pa nan no bai den gang i no mir’é komo héroe. Loke el a hasi no ta algu bon i esei ta un gesto ku e kier hasi. El a manda pidi pa traha un kansion i nan ta ansioso pa sa kiko e kansion ta. Ta un mensahe pa hóbennan i komunidat.

Hustisia sosial restorativo mester bira un pakete pa e hustisia real!

 

 

SHARE

LEAVE A REPLY