Otro siman dia 8 di mart ta dia di Hende Muhé. Den e kuadro aki nos ta pone den e lus di dia aki Neysa Schoop Isenia CFO di Aqualectra (finansiero). Neysa lansa den un kas ku un famia grandi, nan ta 10 ruman i e ta papia di un bon base ku awe tin e te kaminda e ta. E ta papia di ekstremonan, esta di un ekstremo pa otro. Su mama a nase na Venezuela i krese na Aruba i ta koló kla, su tata ta di Kòrsou i koló skur. Por a mira e diferensia den kultura i esei a pone ku nan a lanta komprondiendo e diferensia den ekstremonan di kultura, pretu blanku etc., i esaki a hasi nan e hende ku nan ta awe. Nan ta 5 ruman i despues su tata a haña 5 yu mas. E interesante di esaki ta ku ora su mama i tata a parti for di otro, e mama i tata a keda ku bon relashon i e mama a wèlkòm tur e otro rumannan, segun Neysa a konta nos den Djasabra. I semper tabata un kas ku hopi yu i esei a pone ku tur primu i yu kier ta serka nan. Su mama tabata yùfrou di skol, e tata empresario. El a sali di un kas di trahadó konosiendo hopi bon tempu pero tambe tempunan ménos bon. Tin e temporada ku ora yega kas i sa ku ta bonchi tin i no ta pone kiko tin pero ki kolo di bonchi. Su tata tabatin bon tempu i nan a eksperensia bon tempu. Asina Neysa a haña e espasio pa biaha i mira mundu pero tambe konosé tempu di no tabatin nada. Esei ta e ekstremonan ku el a referí na dje. Tur esaki ta pone ku Neysa ta hopi gradesido. El a lanta den un kas religioso, konosiendo Dios for di chikí i pone sentral den tur kos. E ta kòrda di a bishita e Memorial di Martin Luther King na Atlanta i un parti di e diskurso a bisa ku e manera ku el a lanta ta ku e ta konsiderá su famia i e loke el a hañ’é den dje komo regalo di Pasku. I meskos Neysa ta konsiderá su kaso; E manera ku el a lanta, e enseñansa ku su mama i tata a duna nan tambe su opa i oma sentral, tionan, primunan tur huntu a dun’é e base fuerte pa sigui.
Terminá estudio ku 21 aña
Neysa a kaba skol (PSC) na un edat hóben (17) i a bai Ulanda kaminda el a studia Bedrijfs Economie na Enschede, hopi leu di Amsterdam i Rotterdam. Su mama i tata e momentu ei nunka a bai Ulanda pero otro parti di mundu. E ta e yu di mas grandi i a sali kas na un edat hóben bai studia. Neysa a konta ku un sonrisa ku tabata un tempu dushi, el a gosa hopi i el a prepará su mes asina pa e profeshonal ku e ta awe. Ku 21 aña el a kaba su estudio, den presis e 4 aña ku e estudio tabata, ni un dia mas ni ménos i el a bin Kòrsou bèk i kuminsá traha den sektor finansiero komo akountent. Neysa no tin duele di a bin bèk mesora ounke hopi tabata bis’é pa e keda i haña eksperensia na Ulanda. El a konsiderá ku e eksperensia ku bo ta haña na Kòrsou ta asina balioso i na Ulanda un pais asina grandi bo ta bai spesialisá mas riba un tereno siendo ku na Kòrsou komo ta un pais chikí bo mester sa tiki di tur kos i bo tin di forma bo mes komo profeshonal i bon riba diferente aspekto i e ta hasi bu un otro tipo di profeshonal kompará ku esun spesialisá riba un solo área.
Semper kontribuí pa komunidat
Neysa ta kere si ku 21 aña tabata yòn i kisas si e por bai bèk e lo a pensa den tuma un aña pa sosegá, Pero e no a hasié. E ta gusta arte hopi i kisas e por a bai hasi un aña di arte pero si otro banda el a siña hopi na Kòrsou. E no a pèrdè tòg nada. Bayendo bèk na chikí, Neysa a bisa ku su interes tabata riba hopi tereno manera ekonomia, área korporativo semper a haña su atenshon pero di otro banda e por a mira su mes tambe komo un ama di kas ku su yunan (4), ounke semper envolví den komunidat. Neysa a hasi hopi trabou boluntario pa komunidat manera patfenderei i e gana pa kontribuí ei semper tabat’ei, Nunka el a mira su mes komo direktor di un kompania grandi pero semper kontribuyendo.
Apresiá un tiki mas esfuersonan lokal
Si e para ketu riba su propósito den bida e ta mira su mes komo persona ku ta guia kambio pa komunidat i kambio positivo. I esei por ta den e posishon ku e tin awor aki pero tambe den diferente otro aspekto pero komo e punto prinsipal pa kontribuí p komunidat. I segun Neysa esei e ta logrando esaki ounke semper e ke mas. Neysa a bisa ku Aqualectra ta un plataforma pa logra kambionan duradero pa komunidat. Ta un proseso di kambio komo kompania i ku hopi bia komunidat no ta gradesido na dje. Neysa a sigui bisa den e entrevista ku Djasabra ku bo ta wòrdu kritiká di tur manera i hende no ta wak e trabou ku ta pasa tras di kortina i ta kompará Kòrsou hopi bia ku Merka Ulanda etc., pero nan si ta mira e progreso i unda nan ke ta ku e kompania aki pa Kòrsou. E ta tuma un tiki pasenshi pa yega einan i e tin gana pa komunidat apresiá un tiki mas no solamente e labornan di Aqualectra pero e esfuerso di diferente kompania ku ta hasi hopi esfuerso sin e rekursonan manera kompanianan grandi di afó pero ku tur ta hasi hopi i duna un nivel di servisio ku kisas otro islanan den Caribe no tin. E ambishon pa sigui kontribuí i sigui hasi kambio tei!
No tabata un kaminda fásil
Komo hende muhé ku a yega un puesto finansiero den un kompania asina importante di komunidat tabata interesante pa tende di Neysa si tabata fásil pa a yega te kaminda e ta awe. Nos a puntra Neysa si ora e wak rònt di dje, si tabata fásil pa el a logra. “Komo hende muhé mi tin si bisa lamentablemente ku bo tin di demostrá bi mes un tiki mas tantu. E ta un realidat ku si bo sa di dje bo por traha kuné bon tambe. Mi a kuminsá yòn i mi ta yòn i un hende muhé i bo tin di demostrá bo mes i mustra ku bo sa kaminda kisas un hende hòmber no tin di hasié. Ta algu ku bo sa i bo a lanta kuné. Mi sa ku den sierto ámbitonan bo ta komportá di tal manera i lástima ta ku hende muhé mes ta kaba ku otro i duna opinion di ken mester a yud’é i no ta wak e oranan di mardugá e kantidat di esfuerso ku bo ta hinka aden. Bai laga bo kas i yunan, trese bo yunan ku bo por yega kaminda bo ta. E ta un lucha konstante i si bo ta konsiente di dje bo ta logra”, Neysa a kontestá nos. El a mira ku mas i mas hende muhé a kuminsá sostené otro pero no tur tempu ni tur otro ta asina. Hopi bia nos kompetensia ta nos mes i hende hòmber no ta wak nos manera nos ta wak nos mes. E no mester ta asina i si bo por duna otro mas forsa pa nos krese huntu komo hende muhé i mas forsa nos ta krese mas.
Reklamá bo posishon
Tambe e ta kere ku mester duna mas oportunidat na hende muhé pero e hende muhé mester “claim” su posishon. Hopi bia nos ta keda muchu skondí i no “claim” nos posishon. I pa “claim” bo posishon nos mester por komprondé ku komo hende muhé bo ke ta e mihó kasa mihó ama di kas, mihó yu pero e no ta bai asina. Komo hende muhé tin kos ku bo tin di hasi eskoho na dje. El a bisa ku den su kaso e no ta un bon ama di kas pero el a sòru si pa tin un hende pa yud’é ku su trabounan di kas. Tampoko e tabata e mihó kasa i el a kost’é hopi. Pero ta eskohonan den bida i bo mester sa kiko bo por i kiko bo no por biba kuné. I p’esei pa hende muhé ta importante pa hasi eskoho. No sinta warda oportunidat yega pero dia esun presente, sòru di tene ku dos man.
Den kualke awa ku mi kai, lo mi landa
Pa Neysa kaminda e ta awor aki no ta e plafòn. Pero kiko ta konsiderá plafòn; por ta un plafòn den término di profeshonalismo. Pero Neysa no ta kere ku esaki ta su plafòn i no ta kere ku tampoko ta saludabel pa un hende keda muchu tempu den e mesun posishon. El a bisa ku e ta sinta den e posishon ei ku e final den mente; e no ke men ku e final ta mañan ni otro mañan pero e ta bai tin un final si i esei ke men ku e tin di prepará e siguiente generashon pa tuma over i kua ta e kambionan ku e ke mira i kiko ta e próksimo paso. I den e próksimo paso bida a siñ’é ku ku kualke kaminda e bai e lo para riba su pianan i esei ta dor di a eksperensia diferente kos i ku di tur manera el a landa i dor di a hasi esaki e sa ku despues di esaki den kualke awa ku e kai e lo landa.
Ta hende muhé
I den kuadro di 8 di mart dia di hende muhé, Neysa tabatin e siguiente mensahe; Mi mensahe primordial pa nos hende muhé ta pa ta hende muhé. I ora mi bisa ta hende muhé, pa ami ta e ser vulnerabel, habri, amoroso i empátiko no opstante den ki posishon bo ta. Siendo CFO di Aqualectra, un mundu di hende hòmber i un mundu tékniko, mi no por komportá mi mes manera e hende hòmber, esei ta ami. Serka ami ta un hende muhé i ku esei bo ta mustra vulnerabilidat i dor di ta asina e ta hasi bu mas relatá. E sa ku e por faya i no ta hasi manera e no por faya i esei ta laga e hende sintié mas mihó, pasobra e ta serka di un hende ku por òf ta faya. Esei ta un hende muhé su forsa, e vulnerabilidat ei ta pone ku otro hende por relatá mas na dje i asina bo ta yuda hende krese mas tantu. I sigur ta pashoná den tur loke bo ta hasi. Si nos tene otro su man i bai dilanti komo pais nos lo ta mas mihó.
