CIUDAD DE PANAMA (AFP).- Hende muhé i personanan LGBT ta sufri na un manera fuerte e “represhon polítiko” di gobièrnu di Nicaragua for di despues dje protestanan violento di 2018, segun un informe di ekspertonan di Nashonnan Uní.
Alrededor di 300 persona a fayesé, algun shen a resultá heridá i otro míles di persona a keda fòrsá pa bandoná e pais despues dje manifestashonnan kontra di gobièrnu, ku di parti di mandatarionan nikaragwense a keda denunsiá komo un intento di gòlpi di estado di spònser pa Washington. For di e tempu ei, e gobièrnu liderá pa Daniel Ortega i su kasá Rosario Murillo a oumentá e kòntròl i a stèmpel komo ilegal e kantidat di organisashonnan ku tin krítika riba gobièrnu. Segun e informe di Grupo di Ekspertonan di Derechinan Humano di Nashonnan Uní riba Nicaragua, e represhon ta pió pa hende muhé i miembronan dje komunidat LGBT. “Na Nicaragua, e represhon estatal ku a kuminsá for di 2018 a usa género komo instrumento di kòntròl, humiashon i pa silensiá e hendenan”, segun e reportahe. “Algun shen hende muhé di tur edat, komo tambe muhénan indígena i afrodesendientenan i LGBTIQ+ a sufri múltiple violashonnan di derechinan miéntras ku persekushon polítiko ta bira mas grave, kompañá pa diskriminashon”, segun Ariele Peralta, miembro dje grupo.
Segun ekspertonan di Nashonnan Uní, “hende muhé ta blanko di violensia estatal” pasobra “hopi di nan a liderá e protestanan” kontra di gobièrnu, i komo tal “nan a keda reprimí i ta sufri di detenshon arbitrario, violensia físiko i esaki ta inkluí tortura i violashon. “Pa outoridatnan, e muhé ideal ta e mama obediente i silensioso”, segun Reed Brody, kende ta un dje integrantenan di e grupo di spesialistanan.
Presidente nikaragwense Ortega, di 80 aña i kasi dos dékada na poder, i Murillo, ta akusá organisashonnan internashonal di ta lansa kantidat di mentira riba gobièrnu i ta koperá ku intentonan pa tumba gobièrnu dje pais.
