Hende muhé ta fuerte manera piedra i poné riba pedestal di kristal

Tisa Meulens

Arte di piedra, arte di pinta i hopi mas ta loke Tisa Meulens a laga nos sera konosí kuné. Pebbles by Tisarart ta e nòmber bou di kual Tisa ta presentá su mes. Tisa, un dama fuerte tin talento di Dios i su mama, ku e ta konsiderá super talentoso. Su mama ta un persona masha kreativo kaminda na kas mes el a duna muchanan di Feffik lès.

Tisa a bai biba Ulanda ku su 12 aña. Einan el a bai skol i forma su mes pa loke ta edukashon.  For di na skol e tabatin un habilidat di pinta. E tabata haña 9 bai ariba pa su pinturanan i mayoria di kara. Na e momentu ei e no a hasi nada ku su pintamentu. Pero segun el a bira grandi, su yu a bai for di kas, e yu a kasa i haña yu, Tisa a haña mas tempu pa su mes i a bai buska kosnan ku ta mas serka di su kurason. Asina el a kuminsá pinta i fèrf di forma kreativo.

 

Di pinta, fèrf pa obranan di piedra….

Tisa a kuminsá pinta hende su kara, pinta anatomia i tambe e ta fèrf. Hopi biaha el a tende di su ruman ku e por muchu mas. Aña pasá su ruman a manda un potrèt di piedra. Ora Tisa haña e kosnan aki e ta warda poko te ora e sinti ku e por hasi algu kuné. Pero e biaha aki ora el a haña e potrèt di piedra el a hañ’é asina bunita ku el a bai buska su piedranan na Ulanda. Dor di trein kada bes su obranan tabata bira mas i mas mihó. Dado momentu Tisa mester a bin Kòrsou kaminda e ta rondoná di piedra i a kai mas den e trahamentu di obranan di piedra. Ora Tisa ta liber e ta bai laman kaminda e ta analisá piedra i glas.  El a menshoná ku un bòter di serbes ku awa a bati ta haña su forma natural i hasié algu masha bunita. “Nos piedranan ta wòrdu formá dor di e laman mes, e eroshon ta hasi e piedra bòt i dun’é un bunita forma pa por traha e obranan” Tisa a opservá. Tisa ta forma mama ku yu, e ta forma famia kompleto, i loke a hala nos atenshon ta ku den mayoria di e pinturanan e tin kachó. Tambe Tisa ta traha riba pedido i idea di e hende mes.

 

Obranan na Ulanda i Kòrsou…

Tisa ta sigui konta Djasabra ku su pinturanan ta bai un libreria na Arnhem kaminda nan ta keda eksponé i esun ku ta gusta nan por keda kumprá einan. I tambe na Kòrsou e ta tuma pedido di tiendanan i aki ta bende esakinan tambe ku turistanan.  Na Kòrsou Tisa ta trahando ku un tienda den Riffort ku ta Monart ku ta bende su obranan.

Mi obra, mi pashon….

Loke Tisa ta hasiendo awor ta su pashon i su talento ku e ta dediká su mes na dje. Tisa ta haña ku ta importante pa bo traha den bida i logra loke bo ke logra i tambe bo ta responsabel pa bo bida. I si bo tin famia bo tin responsabilidat pa esei i bo tin di traha pa mantené e famia i bo mes. Pero e mes ta haña ku e ta yega un kaminda ku e persona mester ta pa su mes. E kasá ta hasi su kos, yunan a bai for di kas i e tin di hasi algu ku ta na su kurason pa e hasi. I den su kaso ta arte.

 

Pebbles by Tisarart ta nifiká ku e ke representá nos hende muhénan pa medio di su arte. E ta konsentrá riba e damanan di Karibe i prinsipalmente mamanan soltero. E piedra ta para pa muhé fuerte, muhé sabi i ku tin ‘doorzettings vermogen’. I tambe nos hende muhénan ta masha bunita. “Na kas nos por tin nos pidjama bistí pero ora nos sali nos ta sali bunita. I pa medio di mi piedranan mi ta enfatisá esaki. Ora nos sali nos ta ala pompa i bo no ta mira ku nos tin falta di sèn. Nos ta sali bunita di kabei te tenchi pia i ounke nos no tin hopi sèn nos yunan semper ta nèchi bistí. Nos ta preferá kome pan ku suku pero nos yunan nèchi”, Tisa a enfatisá.

 

Muhé riba kristal….

Tisa ta pone su obranan di piedra riba e piedra di kristal. Esaki pasobra  e ta haña ku e hende muhé mester ta riba pedestal di kristal i si e tabatin sèn e lo a pone e hende muhé riba un pedestal di djamanta. E ta mustra riba e balor di e hende muhé dor di pone nan riba e piedra di kristal.

 

Laman a forma e piedranan…

E no a duna e piedranan forma pero ta laman a duna nan forma i e simplemente ta duna nan parti den su obranan. E tin obranan ku ta su propio potrèt. Un mama soltero ku a sòru pa su yu, e ta inteligente i fuerte. Tisa a haña oportunidatnan pa hasi eksposishon pero su tempu na Kòrsou tabata demasiado kòrtiku pa por hasié.

 

Mi rais ta na Kòrsou….

Tisa ta biba 40 aña na Ulanda. El a bisa ku e bida na Ulanda ta dushi pero e ta sinti falta di Kòrsou. Tempu e tabata mas yòn e no tabatin e sentimentu aki pero miéntras su edat ta subi e ta sinti falta di ta kaminda su rais ta esta Kòrsou. Aktualmente Tisa ta bèk na Ulanda pero el a laga un kantidat di obra keda Kòrsou pa segun e tienda mester, e por entregá esakinan. Tisa ta bin Kòrsou ku regularidat. E ta gusta hende kontentu, hende muhé fuerte i p’esei tur ora e ta bin Kòrsou pe haña energia.

 

Forma e hende muhé den arte pe lora man….

“Nos tur sa ku ekonomia di Kòrsou no ta bayendo muchu bon. Dios a duna nos tur talento i mester ekspresá esaki. Mi soño ta pa lanta proyekto pa hende muhénan pa siña nan hasi obra di man pa nan mes por gana nan sèn. E ta algu fásil. Den ekonomia duru aki no tin sèn pa kumpra material manera fèrf etc. pero piedra ta algu ku por haña tur kaminda. Rònt mundu por haña piedra p’esei mester eksponé i traha riba bo talento. E ke yega na un grupo di 8 pa 10 hende muhé pa e por formanan, siña nan e obra aki pa nan di nan parti despues por sigui forma otro hende muhénan. Pa esaki Tisa ta kere ta importante pa e haña un spònser pa por kubri e gastunan pa forma e damanan aki. Tisa ta sinti ku Kòrsou su arte ta bai lanta for di soño. Kòrsou su arte ta kuminsá biba. “Nos mes ta traha kos bunita i nos tin hopi kos bunita pa traha algu kuné. I p’esei dikon ta laga e hende di afó bin traha kos i para bende. Nos mes por hasié”, Tisa a opservá.

 

“Kòrsou tin muhénan fuerte i talentoso manera Jachmin Pinedo, Nataly Antonia, Valesca Diaz, Jadira Bislik. Esei pa mi djis mustra ku nos tin muhénan fuerte i talentoso na Kòrsou i mester pone énfasis riba nan”, asina Tisa a terminá.

 

Tisa ta alkansabel na Tisvana@hotmail.com 0031617478368 i FB Tisa Vana

 

 

SHARE

LEAVE A REPLY