Hende muhé; empoderá i no kudishá otro
Luna di Mart ta luna di hende muhé. Dia 8 di mart ta selebrá dia internashonal di hende muhé. Lizaima da Costa Gomez komo abogado tin eksperensia amplio ku entre otro divorsio i komo hende muhé e ta duna nos su punto di bista pa loke ta e hende muhé den e sosiedat aktual.

 

Hende muhé por purba tur trabou…

Hende muhé den sosiedat; tiki tiki hende muhé ta yegando posishonnan ku ántes ta hende hòmber so tabatin. Mi ta menshoná e ehèmpel den abogasia kaminda ami huntu ku 4 otro dama dia nan a bin for di Hulanda, nan a studia na Erasmus huntu, nan a huramentá na korte den un solo bia. Promé ku esei tabata haña mas tantu, sigur mayoria abogado tabata hende hòmber. Mesun kos tabata konta pa dòkter. No tabatin hopi hende muhé dòkter. Durante di tempu ku hende muhé a kuminsá bai studia i emansipá den komunidat, ta haña hopi hende muhé tin puestonan klave den komunidat. Delaster añanan tin promé minister hende muhé, abogado, dòkter, poko dia ei un hende muhé ta kore dòmtrùk. E kos ta masha great pasobra tiki tiki por mira hende muhé ta bai hasi mas kos. Delaster tempu pro mira hopi hende muhé pilot, asta dos pilot pareu hende muhé den avion. Tiki tiki ta kibrando e plafòn di glas pa yega puestonan klave den komunidat. Lizaima ta haña ku nos ta yegando.

Lizaima no ta kere ku tin trabou ku no ta pa hende muhé. Komo hende muhé bo por purba tur kos. Ta segun bo kurpa mes bisa bu. “Mi ta kere ku tin trabou ku no ta pa hende muhé’.

Deskriminá…

Tempu Lizaima tabata studiando el a sinti di tabata keda deskriminá. Esei a kuminsá for di na Hogeschool kaminda Lizaima tabata promé, na Leiden i einan tin di traha hopi den proyekto. Ora bo ta traha den proyekto bo mester duna ‘feedback’ na bo otro koleganan studiante i e ta haña ku komo e ta bin di Kòrsou, e tin un fam otro for di un hulandes, e ta brùin, bo ta keda otro trata. Asta un studiante a yega di puntr’é si na Kòrsou ta den ‘hutjes’ nos ta biba. E no tabata reakshoná riba e kosnan ei pasobra Korsou ta forma parti di reino hulandes. Tambe el a ripará ku ora el a bai studia na Erasmus, ora tin proyektonan i nan tende kiko abo komo hende muhé ke bira por ehèmpel abogado òf fiskal, e tabata haña komo reakshon ku e lo no logr’é. Esaki pasobra e ta otro for di nan na Hulanda. Por lo general Lizaima ta haña ku hende muhé tambe no ta duna e otro hende muhé e balor ku e merese67. Esei ta un lástima pasobra hende mester tei pa empoderá otro. Deseá otro éksito den loke otro ta hasi pero awor aki den mundu no ta duna e hende muhé e balor pero alkontrario ta asta pone pia pa otro, ta yalurs i kudishá otro. Hopi bia bo ta kere un hende ta bon kubo, pero ta abo ta bon kuné. Tin bai bo ta kere e otro hende muhé ta kontentu pa bo logronan, pero esei ta resultá di no ta asina. Parse ku nos no ke wak otro bai dilanti. Esei ta un lástima.

https://youtu.be/FIdBRCnOeUE

Empoderá otro…

Awor aki sinembargo Lizaima a ripará hopi grupo riba FB ku ta empoderá otro, ta organisá seminario,  coaching, sostené otro asta den kasonan di divorsio pa sa kon ta karga ku e proseso ei, kon ta bai hasi despues ku e divorsio a Sali. Ta ehèmpel di gruponan riba Facebook ku ta guia otro en bes di kibra bu. Esei ta un indikashon ku e hende muhé ta bai un otro direkshon den último 5 añanan aki.

 

Mi ta muchu mas ku abogado…

Lizaima trahando komo abogado a splika ku e no ta abogado so den su trabou, pero tambe e ta trahadó sosial, sikólogo, coach, ounke e no ke guia hende pasobra e ke lag’é na un eksperto pa hasié, pero e ta hañ’é den e situashon pa komo abogado ta hasi e otro kosnan ei tambe. I prinsipalmente den kasonan di divorsio e ta hañ’é hopi den e situashon ei. Ounke tambe den otro tipo di kaso tambe hende tin e difísil. I e ta duna un palabra di konsuelo hopi bia. Tin bia ta mira un abogado i kere ku ta esei so e ta hasi, pero e ta mas leu. Komo abogado tin bia den kaso di divorsio asta e tin di hasi investigashon. Si tin muchanan menor envolví, e tin di papia ku tur dos partido. E tin di purba semper pa promé ku kuminsá un kaso, wak si partidonan por yega na un areglo, promé ku yega korte.

 

Divorsio por bai basta lihé…

Divorsio por ta mas fásil di loke tin bia e ta bai. Lizaima ta kòrda ku den otro bufete di abogado kaminda e tabata traha, el a ripará ku e kasonan di divorsio ta dura un eternidat. Ora Lizaima a kuminsá hasi kasonan di divorsio i e no por komprondé dikon e prosesonan ta dura largu, esaki no tin pakiko. Ta djis laga e dos hendenna ei sinta dilanti di otro i papia kiko nan ke. Dor di simplemente hasi palabrashonnan huntu, por solushoná hopi kos basta lihé.

 

E hòmber ta karga mas den kaso di divorsio…

Ken ta sufri mas den kasonan di divorsio, muhé òf hòmber? Riba e pregunta aki Lizaima a bisa nos di Djasabra ku e no por bisa niun di dos pero segun e e hende hòmber ta esun ku ta karga mas. Esaki pasobra hopi bia, tin yunan menor di edat den wega. Hopi hende muhé ta usa e yunan kontra di e tata. No ta tur pero hopi bia e ta pasa. Dado momentu e yunan ta bai biba serka e mama i e tata no ta bai wak su yunan tur dia mas. P’esei Lizaima ta kere ku e tata ta keda karga ku mas doló. Esei no ta pa tapa loke e mama tambe ta pasa aden. Un divorsio no ta fásil i no tin ganadó ni pèrdèdó. Niun hende ta kasa pa nan divorsiá. Pero dado momentu si e no ta bai e no ta bai. E divorsio ta resultado di algu ku no a bai bon. I por bisa ku tantu e hòmber komo e muhé ta tuma e paso pa bai divorsiá.

 

Divorsiá Covid Free…

Lizaima a ripará tambe un kambio di aktitut di e hende muhé ora ta trata di divorsio. I esaki ta pasobra ántes e hende muhé tabata mas bien ama di kas i tin tarea pa hasi trabou di kas i wak e muchanan. Ora divorsio kai e muhé ta keda ku solamente alimentashon i ku e yunan. I aktitut awor aki a kambia pasobra e hende muhé emansipá i ku trabou i ta un tiki mas independiente ta ‘durf’ di dal e paso mas fásil. Esaki pasobra nan no ta dependé mas di e hende hòmber. E ya un aktitut positivo pasobra un hende independiente, sigur di su mes ta nifiká ku e tin kurashi di dal e paso i ta mas habrí pa sinta na mesa. Nan ta sinta na mesa i yega na un akuerdo ku e tata/hòmber. Esei ta un kambio positivo den kaso di hende muhé i e ta tambe pa e abogado pasobra no tin proseduranan largu mas. E hende muhé tambe ta mas madurá awor pa pone nan puntonan riba papel i bisa presis kiko nan ke. Esaki segun Lizaima ta di aploudí i ta un kambio masha drástiko den komunidat. I awendia por divorsiá Covid-free pasobra ta djis pone puntonan riba papel, ta mand’é abogado i abogado ta hasi su trabou manera pa e otro partido i e kaso ta bai hopi fásil. Ademas e sistema aki tambe ta evitá hopi solo.

 

No husga otro…

Lizaima no no ta husga niun hende pa e motibu ku el a kai será òf no. Hopi bia un hende ku a kai será, ta algu a pasa ku e ta hañ’é den e situashon ei. “Hende muhé hopi bia tin labios. Bo ta papia grita te asta agreshon verbal. Un hende hòmber no tin e kos ei, e hòmber tin forsa brutu. Bo ta keda yena e hòmber su kabes i e hende hòmber ei su wowo ta bira skur, e ta kue bo choka  i bo ta hasi keho i e mener ta será. Bo no ta wak kiko a kondusí ku el a usa e forsa ei. Tin hopi hende den e situashon ei i mi no ta husga. Un hende su wowo por bira skur i e ta hañ’é den e situashon sin ku e ke. Meskos ku ora bo ta sali bai kaya bo no ke buska problema pero bo ta haña bu den un situashon i ata bu será”. Lizaima a bisa e no ta niun hende pa husga otro, ta Dios so ta husga. E ta purba wak e paden di e hende i ku rèspèt e ta trata tur hende mesun kos.

 

Muhé i hòmber huntu ta manda mundu….

Ta muhé ta manda mundu……Lizaima no ta kompartí e frase ei. E hende muhé mester di e hende hòmber pa manda e mundu aki. Pa nos prokreá por ehèmpel bo mester di hende hòmber, i un hende muhé tin su lugá den komunidat pero no lubidá e hende hòmber tambe tin su lugá. I si mi bisa ku muhé ta manda muhé, mi ta bezig ta deskriminá hende hòmber. I hamas Lizaima ke deskriminá hende hòmber pasobra e hende muhé i e hòmber ta den balansa den komunidat i si tin e balansa ei no por bisa ku muhé ta manda mundu.

 

Kurashi…

Loke mi ke mira kambia serka e hende muhé ta pa nan tin mas kurashi. Kurashi den sentido di si bo ta sintá ku un problema, por ehèmpel si wak den e temporada aki tin hopi hende a pèrdè trabou, hopi divorsio, parehanan ta habri for di otro, problemanan síkiko, anto buska yudansa. Ora bo buska e yudansa ei bo por haña e yudansa spesialisá. E kurashi ei ta pone ku bo por kambia, bo por hasi kambio positivo den bida. Lizaima ke pa hende muhé tin mas kurashi pa mustra nan debilidat, strukturá nan bida. I esei ta algu ku e ta papia ku hopi hende último tempu. I buska yudansa no serka e hende ku bo ta kere ku bo ta bon kuné, buska yudansa profeshonal.

 

Pabien…

Den kuadro di 8 di mart komo dia internashonal di hende muhé Lizaima a manda palabranan di pabien na tur hende muhé riba nan dia. Purba di ta tur dia un mihó mama, kasá, lanta tur dia bisa Dios danki pa un dia nobo pasobra tur dia di nobo ta un bendishon. E hende muhénan ku ta pasando den tempunan ménos dushi i difísil, tin e kurashi di mustra bo parti debil i buska yudansa profeshonal. No keda stèns riba famia i hendenna ku bo ta pensa ta bo amigunan. Yudansa profeshonal, tin e kurashi di dal e paso, mustra bo parti debil pa bo haña e loke bo mester.

 

 

LAGA UN KOMENTARIO

Please enter your comment!
Please enter your name here