Kurator: JetAir ta bankarota for di awe
WILLEMSTAD.-Un situashon basta serio i fèrfelu a surgi na entrada di edifisio di e kompania di aviashon lokal JetAir. Bastante hende a bai na e ofisina pa buska kuenta i rason despues ku a bira konosí ku e kompania a bati bankrut. Hendenan ku a paga sèn pa nan pasashi awor ta eksigiendo pa nan haña nan sen bek.
Polis a akudí pa duna asistensia i trata na kalma e hendenan. EXTRA a trata na drenta den kontakto ku propietario sr. Ribeiro pero no a logra haña un komentario di dje ainda. E situashon ta bira hopi difísil ya ku ta nèt awor ku periodo di fakansi ta kuminsá, i hende a paga nan pasashi ku e speransa pa awor aki nan por biaha, pues e disgustu ta hopi fuerte.
JetAir a pasa hopi doló pa haña nan pèrmitnan di operashon, i despues di esei den temporada di pandemia a sigui paga trahadó i poko poko a kuminsá realisá buelonan di repatriashon. E kompania tabata gosa di un sosten grandi den pueblo te na momentu ku algun siman pasa direpente a surgi problema ora ku avion a daña i no por a kumpli ku pasaheronan.
Na e sitio por a tende ku JetAir a kanselá tur buelo for di awe. Ta bai wak kiko tin nan aktivo pa kubri esnan ku a paga nan pasashi kaba, pero awor e kompania ta den bankarota. JetAir ta bankarota for di awe. Tin pasaheronan pegá na Colombia i otro paisnan. Kurator ta bisa ku e mihó solushon pa e hendenan ei ta pa nan paga un buelo di regreso pa Kòrsou i despues wak kon por kobra e kompania esaki bek.
