WILLEMSTAD/AMSTERDAM – Ayera nochi na Amsterdam tabatin otorgamentu di diferente premio relashoná ku ‘Black Achievement Award 2019’. E evento aki a keda organisá pa Nationaal Instituut voor Slavernijverleden en Erfenis (NiNsee) i komo presidente di e komishon di Hurado, Clayde Menso. E premio aki ta keda otorgá na personanan ku por demonstrá un kontribushon balioso na emansipashon di e komunidat kolo na Ulanda. E nominashonnan a sali for di komunidat mes. A otorgá premio den sinku kategoria pero esun ku a hala atenshon ta deporte den kual tur e nominadonan ta yu di Kòrsou. Al final Hensley Meulens a gana e premio aki pa su kontribushon den e deporte di beisbòl komo promé yu di Kòrsou den Liga Grandi. Tambe ku su éksito nan tantu komo pelotero i komo manager di e selekshon di Reino. Hensley Meulens mes no por tabata presente ya ku e ta na Mexico pa e torneo di Premier 12 ku e selekshon aki. El a aparesé si riba un video call pa e públiko presente i su primu Royston Meulens a tuma e premio na su nòmber. E otro nominadonan den e kategoria di deporte tabata Jemyma Betrian (Martial arts), Christopher Garia, Churandy Martina, Hensley Paulina i Taymir Burnet (ekipo di èstafèt 4 x 100 meter), Taymir Burnet (Atleta), Hensley Paulina (Atleta) i Churandy Martina (Atleta). E otro kategorianan tabata Arte I Kultura, Persona I Sosiedat, Entrepreneur I Edukashon i finalmente Siensia. Menso ta indiká ku nan a risibí sigur 200 nòmber i tur a keda evaluá kual no tabata un tarea fásil.
