Miembronan di prensa ta reuní pafó di Chappaqua Performing Arts Center kaminda ku ayera eks-Sekretario di Estado Hillary Clinton a duna deklarashon.
CHAPPAQUA, USA (AFP).- E eks-sekretario di estado di Merka Hillary Clinton, obligá pa testiguá ayera dilanti di un komishon di Kongreso riba su relashon ku e defuntu delinkuente seksual Jefrfey Epstein, a eksigí pa e presidente merikano Donald Trump tambe keda yamá pa duna deklarashon bou di huramentu.
E eks-presidente Bill Clinton (1993-2001), ta sitá pa komparesé awe, un dia despues di su kasá, dilanti di Komishon di Supervishon di Kámara di Representantenan, kontrolá pa republikanonan. Segun Hillary, e oudiensia ta un maniobra pa “desvia atenshon” for di Trump, akusá pa e veterano polítiko demokrat, di 78 aña, den un deklarashon emití promé ku el a drenta pa komparesé.
Epstein a muri den un sèl di un prizòn di New York den 2019 miéntras e tabata spera su kaso den korte. Tantu republikanonan komo demokratnan a obligá e pareha Clinton pa testiguá, bou di menasa di tuma medidanan legal si nan no komparesé.
E republikanonan tin “hopi pregunta” pa e pareha, segun e hefe di komishon di investigashon, James Comer. E yamada di Hillary Clinton kontra di Trump a keda sekundá pa e demokratnan.
“Departamento di Hustisia ta sigui enkabesá e enkubrimentu di White House”, segun e prinsipal demokrat den e komité, Robert Garcia. “Laga nos hiba e presidente Trump dilanti di nos komité”, segun el a eksigí.
E oudiensia ta tuma lugá ku portanan sera den un sentro di eventonan artístiko den e lokalidat kaminda ku e pareha Clinton ta biba.
Clinton a deseá deklarashon públiko
E pareha Clinton a reklamá pa nan deklarashonnan ta públiko, pero e komité a insistí pa interogá nan tras di porta será. Un desishon ku Bill Clinton a kalifiká komo “puro polítika” i komparabel na un “tribunal di teater”.
Testimonionan tras di porta será sa ta kustumber di un komishon di investigashon, pues e ta duna espasio pa hasi preguntanan profundo, ku pa motibunan legal no por keda realisá dilanti di kámaranan di televishon.
Hillary Clinton den un entrevista ku BBC siman pasá bisa ku su persona i su kasá “no tin nada di skonde”
