Global Tobacco & Nicotine Forum (GTNF) a tuma lugá resientemente na Washington. Gruponan ku no solamente ta pro pero tambe kontra di uso di produktonan ku ta un supstituto pa sigaria, a reuní den e forum global aki. Nos a presensia entre otro representante di FDA ku a hiba palabra pero tambe dòkternan i representante di e diferente produktonan di sigaria alternativo. Un punto ku mayoria di e presentadónan a pone atenshon riba dje ta pa hisa e edat di permití hóben huma di 18 pa 21 aña. Of a lo ménos ku e edat ei so nan por kumpra produktonan ku tin base di nikotina i tabako.

 

Javier Marin ta representante di Philip Morris Internashonal pa Latino Amérika establesé na New York i el a bisa ku e foronan aki ta masha

importante pa diferente motibu, un di nan ta ku nan komo industria por kompartí loke nan ta hasiendo ku representante di gobièrnu, medionan di komunikashon, e gruponan sivil. Ta un foro transparente ku ta trese e invashon den kual nan ta, pa benefisiá e humadónan ku ke sigui usa tabako pero tin opshon di ménos rísiko. I p’esei e tema di e foro aki tabata mas opshon i ménos rísiko. E foro aki a keda bishita pa mas di 400 partisipante i e presentadónan di nivel haltu. E partisipashon na e diferente sekshonnan tabata grandi i spesial esun di FDA. Marin a bisa ku loke ta importante ta kon e foro aki e industria por tin aserkamentu ku outoridatnan manera FDA i asina konosé e maneho spesialmente na Merka ta implementando, entre otro; kon ta trahando ku e alternativanan nobo komo esnan ku por yuda e salu públiko, i e medidanan ku ta tumando pa evitá e konsekuensianan pa hóbennan usa e alternativanan liber di huma. Ta importante pa PMI i nan ta apoyá e medidanan pa e personanan nunka kuminsá fuma i pa nan stòp di huma i si nan ke sigui pa buska opshonnan di ménos rísiko i pa nan tin akseso na informashon pa tuma un desishon bon.

Pa loke ta e parti di informashon Javier Marin a bisa ku esaki ta un tema masha delikado i p’esei nan ta kompartí nan informashon ku outoridatnan den kada pais, ku e komunidat sientífiko i pa nan evaluá e siensia ku ta sostené nan produktonan.

Pa Javier Marin e foro aki a kumpli ku su ophetivonan i un di e temanan ku tabata riba lista ta e falta di informashon riba sigarianan elektróniko i ta danki na e informashon den e foro, ekspertonan médiko por a ripara kiko realmente ta pasando. No tur sigaria elektróniko ta malu i FDA ta hasiendo investigashonnan i mester evitá na saka konklushon promé ku e resultadonan ta kla.

Mike Zeller direktor di e sentro di Tabako di FDA a papia, ounke sin drenta muchu den detaye di nan investigashonnan. E diskushon últimamente ta konsentrá riba Vaping, kaminda ta mustra dede riba kantidat di kaso di hendenan ku a bira malu i tambe muri i ku ta atribuí esaki na Vaping. Mike Zeller na su turno a trese dilanti den e sala basta interesá pa su presentashon ku, FDA su vishon ta un mundu kaminda sigaria no ta krea òf sostené adikshon i kaminda adultonan ku tin mester di nikotina por haña esaki den alternativanan i produktonan ku ta kousa ménos daño.

Esaki na su turno mester sòru a ménos adikshon serka humadónan, enkurashá produktonan inovativo  pa humadónan adulto ku mester di dje, sostené e inovashon di nikotina medisinal i otro  produktonan di sensashon terapéutiko.

Mike Zeller a sigui bisa den su presentashon ku FDA resientemente a outorisá e merkadeo di produktonan  nobo di tabako pa Philips Morris Products, en e kaso aki IQOS (Tobacco heating system).

Outorisashon di e tipo di produktonan aki ta apropiá pa protekshon di salu públiko pasobra entre e diferente klavenan konsiderá, e produktonan ta produsí menor òf nivel abou di algun tóksiko ku sigaria kombustibel (e sigaria original).

 

El a sigui bisa ku FDA ta trahando riba reglanan pa un kantidat di guia ku tin di aber ku tabako i nikotina i pa hasi esaki ménos dañino. FDA a yuda hasi e proseso di revishon mas efisiente, predesibel i transparente  miéntras ku ta relevá e mishon di salu públiko. Tambe FDA ta sigui asistí fabrikantenan pa medio di informashonnan online. Entre otro por menshoná ku na luna di sèptèmber e atministrashon di Trump a anunsiá ku FDA tin intenshon di finalisá un maneho ku ta duna prioridat na agensianan ku ta apliká lei riba e merkado, outorisando rekisitonan pa sigarianan elektróniko  ku no ta usa tabako pero sin sabor. Pronto sigur Zeller lo presentá mas detaye riba implementashon di e maneho aki.

Ta intenshon segun Zeller pa bin ku un kampaña pa mustra hóbennan ku uso di e produktonan di sigaria elektróniko meskos ku uso di sigaria, ta pone nan na rísiko di adikshon i otro konsekuensianan di salú. I den e kuadro aki tin diferente propaganda koriendo den prensa.

Zeller a bisa e proposishonnan ta pa kumpli ku nan obligashon ku públiko ta komprondé i ta na altura di e konsekuensianan. El a papia di vaping i ta di kuantu kaso ta refiriendo di dje. E sifranan 530 kaso i 7 morto konfirmá. Nan ròl di FDA ta pa traha ku CDC pa ora tin investigashonnan esaki bai pa ekspertonan pa por komprondé kiko ta den e produktonan aki.  Tin indikashon ku mayoria di e kasonan ta envolví THC (Tetrahydrocannabinol Produkto ku ta haña den cannabis).  Tin algun tin zeta di THC en dje pero no tur. Tin algun di e kasonan kaminda e víktima ta bisa ku e úniko kos ku el a usa ta un produkto ku ta kontené nikotina.

Marc Firestone ta ko fundashon i presidente di e instituto pa inklushon den e profeshon legal i tambe profesor athunto pa lei na New York Law School i ta un di e hòmbernan grandi di Philip Morris International. Den su presentashon el a bisa ku e proposishon ta pa kumpli ku  e nesesidat di hendenan ku ta huma kaba i ku ta bai sigui huma pa duna nan informashon riba mihó produktonan. Ta un konsepto nobo. E ta kòrda mas di 20 aña pasá ora e tabata forma parti tambe ta diskushonnan di regulashon di produktonan di sigaria huntu ku diferente hendenan di lei i dòkternan i nan a pone énfasis pa enfatisá serka e produktonan di sigaria pa traha produktonan ku ta ménos dañino. Tabata un yamada bon kla i nan a usa nan fuentenan pa inová den e área di produktonan di tabako i nikotina, un yamada pa inovashon na interes di esun ku ta huma i ku ta kontinuá huma.

 

 

Konstantinos Farsalinos ta kardiólogo i investigadó na Onassis Cardiac Surgery Center na Etenas Gresia, na e universidat di Patras Greece’s Department òf Pharmacy i na skol nashonal pa salu públiko di Gresia. E ta spesialisá den ‘echocardiography’ i den investigashon di produktonan ménos riesgoso di humamentu i tabako. I durante di su presentashon el a pone énfasis riba informashon ku ta sali eifó. E ta bisa ku nan no ta permití pa gaña hende i den asuntu di vaping tin mal informashon saliendo eifó. Pa loke ta e THC el a bisa ku esaki hende ta us’é pa hopi tempu kaba.

Pero e fenómeno nobo ta ku ta pone den e líkido ku ta keda usá den e aparatonan di sigaria alternativa ku ta usa bateria. Tin kaminda e produkto ta legal pero tambe kaminda e ta ilegal. I asta kaminda e ta ilegal hende ta kumpra den e merkado pretu pasobra asina ei e ta mas barata. I por mira entrevistanan riba Internet kaminda ekspertonan ta bisa ku e personanan ku a haña problema asta morto a kai tin di aber ku THC pasobra e víktimanan mes a bisa ku nan a usa esei. Kaminda tin e merkado pretu no tin kontròl di kalidat i no sa kiko hende ta usa i nan ta usa e kosnan mas barata ku tin. Pero pa Konstantinos no ta THC riba su mes ta e problema pero tin indikashonnan ku tin algu ta kousa daño ku ta keda usa den e líkido ku ta e problema. E ta sospecha pero no tin evidensia di dje ainda ku mirando e kasonan reportá ku solventenan den e líkidonan probablemente  zeta a kousa e problema. No mester pone zeta den e aparatonan segun Konsantinos.  Ora hende kumpra produkto di merkado pretu i produkto ilegal nan ta haña kalidat malu. Kualke kaso ku no a keda asosiá ku THC kisas ta mal informashon òf informashon falsu.

 

 

Vicky Porter a trese testimonio dilanti kon e produktonan alternativo di sigaria a yud’é. El a bisa di a purba masha hopi método pa stòp di huma. El a keda hipnotisá, el a usa laser, el a usa kantidat di otro método ku hende por imaginá nan mes.

I ta ku e sigarianan alternativo aki el a kambia di e sigaria konvenshonal pa esun ku ta ménos riesgoso. I p’esei e ta kere ku mester tende e konsumidó, laga e konsumidó papia i trese su eksperensia dilanti.

 

Mikael Franzon ta konsehero hefe médiko na PMI ku konosementu dirigí den liderato sientífiko, stratégiko i operashonal. Franzon tin 4 aña na PMI i tabata un  reto pe pa mira e transformashon den e industria di sigaria. I el a enfatisá riba e forma ku nan ta keda skrudiñá entre otro pa FDA. Loke nan ta hasiendo pa redusí uso di tabako el a bisa ku nan di PMI ta buskando forma pa redusí e produkto ku ta kousa daño. I den e kuadro ei a wak loke ta bin di sigaria, e temperatura haltu ora ta huma i e temperatura haltu ei ta kousa daño. I mas abou e temperatura ta ménos daño. Redusí loke ta kousa daño ta e punto ku nan ta pone atenshon riba dje.

I pa tin e efekto riba e populashon pa redusí e daño di humamentu bo mester tin dos punto importante; e promé ta redusí e daño i na di dos lugá pa tin un produkto ku ta duna e mesun sensashon di nikotina ora e hende us’é. E nikotina ta importante pa hasi e kambio ei. Ta einan nan ta, nan ta desaroyando e produkto IQOS ku ta kalentá pero no kima. Nan tin 4 plataforma i IQOS ta den desaroyo pero tambe nan tin otro ku ta usa tabako ku tambe ta kalentá. I nan a renová e modelo di IQOS.

Pa loke ta e investigashonnan sientífiko Franzon a bisa ku  esakinan nunka ta bai mes lihé ku nan ta deseá. Komo kompania di tabako nan no a komprondé ora nan a kuminsá e kaminda aki, kiko e lo a trese kuné, kiko ta e guia por ehèmpel di FDA. Tin 4 pa 6 nivel ku ta for di desaroyá e proyekto i subi bai ariba i tur ta pasa dor di FDA pa keda skrudiñá.

 


Na mundu tin 1,1 bion humadó i aki 4 aña lo tin probablemente e mesun kantidat. Si puntra kualke humadó ku nan ke huma, mayoria ke stòp i masha poko lo logra. Bo mester tin mihó eskoho i alternativa pa hendenan ku no ke stòp i ke sigui huma. Si bo nunka a huma, no hasié, si bo ta huma stòp di huma. E mihó forma pa evitá malesa ta pa stòp pero esun ku ke sigui huma ta mihó e kambia.

LAGA UN KOMENTARIO

Please enter your comment!
Please enter your name here