SAN CRISTOBAL (AFP).- Un radio emisora regional ku 70 aña di historia na Venezuela djasabra último a reanudá su operashon den presensia di outoridatnan lokal, despues ku luna pasá riba òrdu di regulador di telekomunikashon nan mester a stòp di transmití.
Radio Mundial, ku ta operá for dje siudat di San Cristóbal, estado Tachira, a stòp di transmití pa vensementu di su pèrmit, segun Komishon Nashonal di Telekomunikashon di Venezuela (Conatel). E siere a provoká protestanan generalisá den e region.
“Radio Mundial ku mas di 70 aña a keda saká for di aire pa instrukshonnan di Conatel i ami komo gobernador a dal e pasonan nesesario pa e radio emisora aki ku ta duna bida na e estado por bin bèk”, segun e gobernador di Tachira, Freddy Bernal.
E direktor dje emisora Nelson Chacín, a ekspresá su satisfakshon. “Mi ta kontentu no pa ami so, sino pa e trahadónan ku despues di 47 dia di interupshon nos por t’ei bèk”, segun el a indiká.
Sindikato Nashonal di Trahadónan di Prensa di Venezuela a yega di bisa ku Radio Mundial ta blanko di atakenan den pasado. Den 2019 inkluso hendenan kara tapá armá a purba na drenta e instalashonnan dje emisora.
Un aña promé, deskonosínan a kousa daño na e antène di transmishon dje radio emisora.
Mas di 200 medio di komunikashon a haña nan mes obligá pa sera na Venezuela meimei di denunsia di sensura for di despues ku chavismo a yega na poder den 1999.
