WILLEMSTAD.- Ayera mainta trempan ambulans a keda dirigí ku urgensia pa Biesheuvel pa asina atendé ku un peaton ku a keda alkansá.
Na yegada di outoridatnan na e sitio a komprondé ku a hóben peaton ku ta bendedó di juice na e sitio a bai para riba alsera ora lus a bira bèrdè, pero dado momento a keda alkansá pa un vehíkulo aserkando riba velosidat.
E choke tabata unu basta fuerte ku a kibra mitar di e glas di outo lagando e hóben herida i ku hopi doló.
Paramédikonan a duna e hóben promé asistensia i despues el a keda transportá pa departamentu di emergensia di CMC kaminda el a keda interná despues di asistensia.
Polis i tambe ForenSys a atendé ku shofùr di e vehíkulo i a registrá tur kos pendiente pa mas investigashon.
