Korte di Utrecht ta konkluí
WILLEMSTAD. – Korte di Utrecht a dikta sentensia den un kaso ku un hóben yu di Kòrsou di 20 aña di edat, na kastigu hubenil, pa motibu ku dia el a kometé e echonan kastigabel e tabatin 18 aña di edat. Algun aspekto ku e rapòrt di Reclasserig a konkluí ta ku e hóben ta tras di gana plaka fásil i mester di struktura den su bida. Ku su edat di 20 aña ainda e no ta kla pa biba riba su mes i ta dependé ketu bai riba su mama.
Ta trata di un atrako ku e hóben aki a kometé huntu ku otro den un “snackbar” den Hilversum. E dia ei nan a drenta den e “snackbar” ku kuchú den nan man i un di nan tabatin algu paresido na un arma di kandela. Nan a drenta den e negoshi kasi 11 or di anochi, ora ku e señora doño di e negoshi tabata kla pa sera su negoshi. E dia ei nan a bai ku 500 euro.
Sinku dia despues nan a drenta den supermerkado i nan a keda drenta i piki mas o ménos 300 euro na produkto i sali sin paga. Tabata fásil pa polis a realisá nan aresto, pa motibu di kámara di seguridat i tambe tur dos kaso nan a hasi esakinan ku mesun pañanan bistí i kèts na pia. Dia di nan aresto a haña nan ku 84 gram di hashis den nan poder.
Pa komprondé e hóben su karakter i dikon e ta hasi e kosnan aki, tabatin 5 tratamentu den korte pa e kaso aki. E promé tratamentu tabata 5 di yüni 2020, miéntras kasonan ta datá novèmber 2029 i e último tratamentu tabata 12 di mart 2021 i dia 26 di mart tras di lomba tabatin veredikto.
E karchi di kastigu di e hóben a yu di Kòrsou aki no tabatin nada partikular ariba, ku solamente algun but ku el a haña.
E loke ku a sali na kla for di rapòrt di Reclassering ta ku ounke e hóben aki tin 20 aña di edat, pa motibu nan di nivel práktiko, ainda e ta dependé di su mama. Un di e puntonan ta ku Reclassering no por saka afó kiko ta rísiko di residivismo pa ku e hóben aki, ounke ku e pensamentu ta bai mas lihé ku e chèns ta grandi ku e hóben aki lo por bolbe faya. Tur kos ta indiká ku e ta bai tras di ganamentu di plaka fásil.
Korte a stipulá kondishonnan ku e hóben aki mester kumpli kuné bou di guia di Reclassering i ku esaki nan ta spera ku e hóben lo por haña e kaminda bon pa bai dilanti.
El a keda kondená na 200 dia detenshon hubenil, di kua 43 dia lo no ke ehekutá i dos aña di prueba. Banda di esaki korte a stipulá un lista di kondishonnan ku e tin di kumpli kuné i un di nan ta sigui guia di Reclassering te dia ku Reclassering haña ku esaki no ta nesesario mas.
