WILLEMSTAD.-  Un dama di 21 aña ayera a haña un chèns di su bida, despues ku hues Carmelia a kombertí e demanda di fiskal pa e bai bèk  prizòn, pa un kastigu kondishonal i tambe trabou pa komunidat.  E damita ta keda akusá di a pòst un pakete ku tabata kontené 589 gram di koka pa Merka. E akusado ayera a presentá den sala di korte pa responsabilisá su mes pa su akto.

Segun e akusashon, dia 8 febrüari 2021 el a pòst un pakete ku tabatin artíkulonan di baby. E kachó di duana a reakshoná riba e pakete i na momento ku nan a habrié, duana a haña vários artíkulonan di baby. Den e pakete tabatin un maleta kòrá, ku tambe tabata kontené mas artíkulonan di baby. Na momento ku a listr’e mas mihó, e personal di duana a ripará ku e maleta su bòm tabata basta duru. Ora a bora e maleta, a sali un puiru blanku afó ku a  resultá di ta koka.

E akusado a konta ku e dia ei e tabata sintá na kas, ora ku un amigu di dje ku tabata su eks, a bèl e for di afó pidié pa  hasié un fabor. E amigu a bis’é ku e por a tuma un pakete serka un hende pa e pòst e pe. Segun e akusado, e mester a tuma e pakete serka un hòmber deskonosí pe riba Brionplein. Dor ku e ta konfia esun ku a pidié e fabor, e no a wòri chèk e pakete.

El a bisa di a haña mas o ménos 200 florin pa pòst e pakete. Hues a puntra e akusado, si e no ta haña straño ku un hende ta bèl e for di afó pidié hasi un fabor asin’ei.

E akusado a bisa ku el a hañ’é straño promé bèrdat, pero despues a bai di akuerdo pa hasi e fabor. Segun e akusado, e hende ku a trese pakete pe, no tabatin un sédula bálido, p’esei no por a pòst e pakete.

E akusado a bisa ku e ta gusta yuda hende, “asina mi ta i e estudio ku mi a kaba na skol, ta di yuda hende”. Hues a splika e akusado ku awendia no por konfia pa pòst pakete pa niun hende. Tur bia ta sali den korant hendenan ku ta pòst pakete ku a resultá ku tabatin droga aden. Fiskal a haña e akusashon kompletamente probá i a bisa ku tipo di aktonan aki i mirando e kantidat di droga ku e tabatin kastigu di prisòn mará na dje.

Mirando esaki fiskal ta yega na un demanda di 15 luna di kual 9 kondishonal.

Su abogado mr Marshall a bisa su defensa entre otro ku ta trata di un damita ehemplar ku a kaba di terminá su SBO ku éksito i ku bunita sifra riba su rapòrt. E ta esun ku ta yuda su tata i tin un trabou figo den horeca. El a pidi hues pa no mand’é prizòn bèk, pa motibu ku esaki por ta devastador  pe i lo hiba atras.

Despues ku hues Carmelia a bai pensa el a bin bèk i bisa ku ta di akuerdo ku un kastigu di prizòn, mirando e akusashonnan di e akusado. Pero dor ku e akusado ta un “first offender” e ta tene kuenta ku el a kaba di haña su diploma, tin un trabou figo i ta yuda su famia. P’esei  hues ke dun’é un chèns di oro ku e tin ku tene ku dos man i no bolbe hasi mes kos. Mirando esaki hues a konden’é na 12 luna kompletamente kondishonal  i pa e sinti ku el a hasi robes, e kastigu máksimo di trabou ku 240 ora. Hues a atvertí e akusado ku otro bia no tin mas chèns pe. E akusado tabata awa na wowo ora el a tende ku hues a dun’é un chèns.

 

LAGA UN KOMENTARIO

Please enter your comment!
Please enter your name here