WILLEMSTAD.- Ayera mainta e hóben polítiko/promotor Athly Maria kende a keda detené djasabra último, a rekobrá su libertat. Anteriormente a detené Athly i tambe un dama despues di un diskushon ku a surgi, kaminda tabatin maltrato i destrukshon, segun e informe di polis.

Abogado di Athly mr. Becher a indiká ku a logra libertat di Athly mirando ku no tabatin sufisiente prueba, pa por mantené será.

EXTRA a komprondé ku e dama tambe a rekobrá su libertat ayera.

Mal kontentu den Partido

Ayera mainta na momentu ku ya Athly a rekobrá su libertat, lider di Partido Trabou pa Kòrsou Rennox Calmes a publiká un komunikado kaminda e ta indiká ku; Partido Trabou pa Kòrsou a opta pa retirá e kandidato pendiente desishon di Ministerio Públiko.

E komunikado aki a keda firmá pa solamente sr. Calmes i no ku konsientisashon di direktiva kompletu, ta loke EXTRA por a komprondé for di deklarashon di fundadó di e partido, sra. Maria na otro medio di komunikashon. E señora a bisa ku durante di un reunion, direktiva a konsehá pa warda hustisia hasi su trabou i no huzga ainda. Esaki a trese un mal kontentu den partido mirando ku no ta tur hende ta riba mes un liña

Miéntras ku Calmes a indiká di a retirá Athly, Athly a bisa pa tur hende keda trankil i tur kos ta sigui normal pa ku su partisipashon na elekshon dia 19 di mart próksimo.

LAGA UN KOMENTARIO

Please enter your comment!
Please enter your name here