WILLEMSTAD.- Dia 23 di yüni 2018 Foundation Jazz Meets Cultures a organisá e di dos edishon di Jazz Meets Cultures ku e meta pa rekoudá fondo pa por yuda nos hóbennan ku desaroyo di nan talento den músika i baile.
Na desèmber último, e fundashon a duna informashon di e hóbennan entre 8 pa 14 aña ku lo bai haña lès di músika serka maestro Dennis Aalse bou di patrosinio di Foundation Jazz Meets Cultures i Cinex.
E hóbennan aki a keda reklutá for di e 4 barionan di e “Plan di Urgensia” di Gobièrnu di Kòrsou, ku ta Otrabanda, Buena Vista, Barber i Montaña.
Djabièrnè dia 8 di yanüari último, a duna inisio na e proyekto aki, esta e formashon musikal di e hóbennan. Na e okashon ei, a hiba palabra sra. Denise Priest di Foundation Jazz Meets Cultures, sr. Ramon Kofijberg di Cinex, sra. Guiselle Giterson na nòmber di Plan di Urgensia i mas ku klaro sr. Dennis Aalse, e dosente.
Ta e intenshon pa prepará e muchanan di forma ku nan tambe por presentá den e di tres edishon di Jazz Meets Cultures dia promé di yüni próksimo.
Pa bo keda na altura, kòrdá ‘like’ i bishitá e página di Facebook di FJMC, www.facebook.com /JazzMeetsCultures.
