Youth in Development Foundation ta un fundashon ku tin e meta pa traha riba desaroyo di nos hubentut. Nan a lansa awor e proyekto Let’s Get Connected. Hóbennan ban konektá. E promé seshon lo tuma lugá 4 di yüni i lo start ku un kick-off. Den e promé enkuentro e hóben nan lo haña e oportunidat di sera konosí ku nan mes, ku nan grupo, i e diferente profeshonal nan ku ta forma parti di e proyekto. Rashel Hawker i sikólogo Alyssa Liberia a splika Djasabra kiko por spera di e fundashon. Rashel a splika ku ya hopi hende konosé e proyekto di Brigada di seguridat i formashon te aña pasá tabata kai bou di fundashon Bos di Hubentut. Aña pasá mirando ku e brigada di tur e proyektonan ku Bos di Hubentut ta ehersé, e direktiva a mira ku nan ta esun mas fásil por para riba su mes. Brigada tin un edifisio den Laufferstraat i pa skohe entre e proyektonan pa para riba su kurpa, a skohe Brigada di seguridat i formashon. Di e forma ei a kuminsá e pensamentu pa laga Brigada kai bou di un otro fundashon. Brigada no ta un fundashon pero un programa ku Bos di Hubentut tabata kanalisá. Einan a kuminsá e idea di un otro fundashon ku e focus tambe riba hóben i ku Brigada ta kuadra den e meta i vishon aki. Asina nan a aserká Sheila Alberto a aserká Ditmar Oleana ku e pensamentu pa e bira presidente di e direktiva. Oleana a haña e idea unu bon i ku a aserká pa ta presidente i asina a forma e direktiva. Asina a yega na Youth in Development Foundation bou di kua Brigada ta kai pero ku tin hopi idea, meta ku no ta Brigada so.
Forma e hóben
Rashel a splika ku komo fundashon mester por akapará mas tantu hóben posibel sino bo nifikashon na Kòrsou no ta asina bálido ei. Brigada a pasa su añanan i e tin su struktura ku por duna e fasilidat pa bin ku mas proyekto ku ta akapará otro hóbennan. I asina a lanta e otro proyekto ku ta Lets Get Connected (ban konektá). E idea a bin a base di e eksperensia di hóbennan di brigada. E hóbennan di Brigada ta haña formashon físiko i tin diferente área di formashon, papia ku hóben, public speaking pero tòg tabatin un parti ku a sinti e nesesidat. Hóbennan no tur ora ta habrí pa papia dilanti adulto òf tin sierto kos ku nan ta sinta kuné ku nan no por konektá ku niun hende pa por papia i ekspresá nan mes. I nan a ripará ora nan tabatin dianan di mentor un bia pa luna ora nan ta bin ku u tópiko òf hende di afó i den un di e tópikonan tabata depreshon. Einan a ripará e interes asina grandi ku hóbennan papiando sin kier a bai kas. Esei ta mustra e hóben a haña e oportunidat pa papia di un tópiko ku tin bia na kas no ta bin dilanti kisas pa bèrgwensa òf ta kere ku e hóben no ta pensa mes riba e tópiko ei. Rashel a splika ku nan a bin riba e idea pa un proyekto di Praat Groep kaminda hóbennan ta bin huntu i kombersá riba tópikonan, òf tambe hóbennan ku tin mesun situashon i reto pa nan papia i tende di otro kon a sali for di e situashonnan ei. Asina nan a kuminsá skibi e proyekto pa Brigada pero ora e fundashon a lanta nan a pensa pa akapará mas hóben ku no ta esnan di Brigada so. I asina nan a pensa pa span nan alanan i trese mas hóben.
Ban konektá
I asina a bin riba e nòmber di Let’s Get Connected. Hóbennan ta bin dilanti ku tópikonan, ta bin ku profeshonalnan ku ta traha dirèkt ku hóben. Nan no ke profeshonalnan ku ta simplemente bin bisa kon mester ta pero e intenshon ta pa e profeshonal konektá ku e hóben, kaminda e hóben por papia i e profeshonal ta dun’é e informashon korekto ora ta sinti e nesesidat ei. No ta bai pa siña e hóben loke nan tin den mente. I asina Lets Get Conected a haña bida.
Tópikonan mas interesá serka e hóben
Rashel a sigui splika ku nan tin un stazjèr di Ulanda ku ta yudando ku tópikonan. Pero loke nan ke sa ta si hóbennan ke papia di dje, asina e stazjèr a hasi un enkuesta den forma di kombersashon ku hóbennan i diferente tópiko a bin dilanti. Entre otro e hóben ke papia di sosial media, kon ta mira Instagram. Imágen di hóben mes, abuzu tambe nan ke sa mas di dje. Insesto ta otro tópiko. Tur ta hóbennan mes a trese dilanti di ke papia riba dje. Tambe Gangban i hopi kos mas pa mustra kuantu kos hóbennan ta eksperensia. A traha un sekuensia pa asina atendé e tópikonan un tiki pisá ku e hóben.
Tres modulo
Alyssa Liberia ta sikólogo ku ta traha pa e fundashon aki. El a duna un tiki mas detaye di kon e programanan ku ta forma e proyekto di Let’s Get Connected ta parti den dje. Segun Alyssa e promé modulo ta “ami i mi desaroyo”. Ei den ta papia ken e hóben ta, kon e ta desaroyá su mes, kon e ta mira su mes, konfiansa propio. E di dos modulo ta “ami i mi peers”. Esei ta e hóben i e hendenan rondó di dje. Red vlags; kon pa rekonosé den amistat i relashon ku otro. I pa rekonosé kosnan ku no ta yega na e abuzu ku e hóben ke papia di dje. E otro modulo ta “ami i mi famia”, Den hopi kas tin tabú ku no ta papia di sierto tópiko i asta e hóben no ta sintié seif pa papia ku su mayornan di sierto tópiko. Ta tata di 3 modulo ku nan lo profundisá den riba, tópikonan mas sensibel.
Stigmatisá
Alyssa Liberia ta dediká su mes komo sikólogo na hóbennan di e fundashon Hóben den desaroyo. El a splika ku hóbennan ta interesá i ta habrí pa papia. Den komunidat tin un stigmatisashon ku sikólogo ta pa hende loko i a imponé den hóbennan. Ora e hóben tende di sikólogo nan ta haña miedu. RE hóben ta habri den kombersashonnan ku e ta hiba ku nan, nan ke papia, i no ta importá e título ku Alyssa ta papia pero e hóben ta papia.
25 hóben so
E proyekto ta pa hóben di 12 p 18 aña ku por partisipá. Ta un proyekto piloto i intenshon ta pa despues por amplia i tuma mas hóben. Awor nan ta kuminsá ku solamente 25 hóben. Dikon e kantidat ei so. Rashel a splika ku nan ta un fundashon nobo i a pidi finansiamentu na Samenwerkende Fondsen ku ta dirigí riba e kantidat ei. I p’esei ta pidi hóbennan pa inskribí purá pasobra tin algun lugá ainda habrí. Esaki ta un tèst pa por mira pa den futuro, den un plano mas grandi ku nan por akapará mas hóben. Ta asina Brigada tambe a kuminsá esta ku 25 hóben. Mester kuminsá un kaminda i un manera ku por atendé ku e grupo. Intenshon no ta pa shou kantidat grandi di hóben sino e meta ta bai pèrdè. E intenshon di tiki hóben ta pa por konektá mihó ku otro. Ora e grupo ta chikí e hóben ta yega na bùrt pa papia mas fásil i esei ta nan meta i vishon ku Lets Get Connected. No simplemente nan ta bin ku un proyekto pero nan ke logra e meta ku a pone kaminda hóbennan ta haña e espasio seif pa nan papia.
Disiplina konsiente
Rashel a splika tambe ku nan ta bai usa e método di Disiplina konsiente. Ta trata di un método desaroyá na Merka. E método aki ta ku ta bai skol i ku dosentenan envolví. Rashel i tres otro kolega mas di Bos di Hubentut a sigui e kurso aki i kon pa hink’é aki na Kòrsou. I disiplina konsiente ta un bon método pa nan por usa den Let’s Get Connected kaminda un di e metanan ta pa krea un espasio seif kaminda e hóben ta sintié trankil, sin niun menasa a strob’é di ekspresá su mes. Di dos ta konektá ku otro; kiko por hasi kaminda e hóben ta sintié konektá. Un hende ku sintié konektá ku algu ta mas habri pa siña. Si e hóben no ta ok ku otro, e no ta habri pa papia pero si e ta sintié bon ku otro e ta papia mas fásil. I na final ta papia di solushon di problema. Aki na Kòrsou e ta bai den hiba e kombersashon i kon nan lo dil den e situashon. Nan lo bai usa ponensianan.
Kick off 4 di yüni
Dia 4 di yüni lo tin un kick off. Lo introdusí nan tópikonan e dia ei i lo dura 15 siman tur djasabra 10 pa 12.30 na Jan Otzenstraat den sala di Bos di Hubentut. Si abo hóben ta entre e edat di 12 pa 18 aña, i bo ta interesá di forma parti di Let’s Get Connected òf abo komo mayor, òf tutor ta mira e proyekto aki komo un oportunidat pa bo yu, inskribí bo yu na e proyekto aki. Inskripshon ta solamente 15,00 Florin
Subi e página di instagram @lgconnected of facebook Let’s Get Connected, i yena e formulario. Number di WhatsApp ta +5999 564-2022.
Vijf kamp lo bin bek
Banda di e proyekto di Ban konektá e fundashon Youth in Development lo bin ku mas proyekto den futuro. Un di nan ku nan ke bolbe duna bida ta Vijf kamp na skolnan básiko. Rashel a bisa ku nan ta bezig ku kon nan lo bai hasié. Vijf Kamp ta un proyekto di hopi aña. Tabatin un organisashon ku tabata organisá e evento aki i Brigada tabata sostené. Esnan na kabes a aserka Brigada pa sigui kuné algun aña pasá i awor ku e fundashon di Youth in Development nan ke bai ku e reto ei. Nan kier wak kon e evento tabata i kon por reaktiv’é. E ta muchanan di skol básiko ku e intenshon ku skol sekundario klas 1 i 2 tambe por partisipá. Rashel no kier a divulgá muchu pero el a enfatisá si ku e lo haña nan toke ounke usando hopi kos di loke a yega di usa den e tan konosí Vijf Kamp.
Nos edukashon
Rashel a bisa ku e formashon i enseñansa di mayornan di den pasado a sosodé ku e informashon ku nan tabatin na e momentu ei. Si nan tabatin sigur lo e duna e yunan mas p’esei no por husga loke a wòrdu duná na e momentu ei. Pero Rashel a bisa ku si e wak e mes, e ta hopi sigur ku si e no a lanta den e famia ku el a lanta, e lo no ta sintá einan. Esei ta un prueba ku loke bo a haña, esei bo ta sigui bai kuné. Tin hóben ta pensa pa pone loke mayornan a siña nan yunan den pasado i bai otro manera pero despues hopi ta realisá ku loke e mayor a eduká den pasado no tabata malu. Loke a wòrdu siñá i ku ta di gran balor ta importante pa kue, modifik’é i sigui bai.
