Dia 7 di yüli último T’keyah Eugenio a keda korona komo Miss Curaçao Teenager 2019. Un hobensita masha simpátiko, positivo ku ke ta un ehèmpel pa tur hóben na Kòrsou. T’keyah tambe a bai ku e premionan di Mihó Proyekto, miss dinámiko i miss internet. T’keyah òf tambe Titi manera su sernan kerí ta yam’e a habri su mes pa Djasabra, sinta den un dushi ambiente na Acoya Hotel, ku ta e kas ofisial di Miss Curaçao Teenager. “Semper mi tabata gusta e mundu di beyesa, pero nunka a kere ku ta algu ku mi kier a keda hasi. Mi ta kòrda di ami tabata chikí, mi tabata den un show di Dany Janga i di einan mi a partisipá tambe den e show di miss Barbie. Ora mi ta riba stage mi ta sinti mi masha dushi mes, manera ta aki mi ke ta i tabata masha difísil pa nan a baha mi for di stage e tempu ei”, T’keyah a bisa ku un sonrisa. Di einan Titi a realisá ku ta esaki ta loke e ke hasi. “banda di esaki mi mama tambe tabata un ehèmpel p’ami. Mi mama a sali miss Karnaval”, el a konta nos. E tempu ku el a subi stage ei, e tabatin 8 aña.

 

Estudio promé….

Titi ta hopi konsiente ku su estudio mester ta na promé lugá. E tabata studia i ora e sobra tempu e ta hasi modelahe. Den temporada di fakansi e ta hasi uso di e chèns ku ta presentá pa e por dediká su mes na loke e ta gusta mas. Komo modelo, Titi a splika ku el a siña traha riba kurashi i siguransa den su mes. Kòrda ku no ta un hende so ta para wak bo modelá, pero ta dilanti di un multitut esei ta sosodé. Esaki ta siñ’e un mundu diferente, un otro personalidat pero por ehèmpel den su kaso e no ta simplemente T’keyah pero e ta T’keyah the artist. Bo ta siña di ta elegante, un otro persona i esei ta e sintimentu ku Titi ta gusta di modelahe, voral riba esenario.

 

Mundu di beyesa….

Den futuro Titi ke siña den e mundu di beyesa, ounke e ke kaba ku su estudio promé, hasi beyesa banda di dje i wak kon mas aleu e por kombiná nan dos. Awor aki Titi ta den Havo 4 i ora e kaba e ta wak si e lo keda Kòrsou òf bai den eksterior. I kaminda mi estudio hiba mi einan lo mi bai. I si ta Kòrsou e keda, no ta nada straño ku e lo por bai partisipá na Miss Kòrsou tambe.

 

Solushoná problema….

T’keyah ta gusta di ta riba internet, e ta masha sosial ku su famia, e ta gusta sali ku su mama i ta gusta wak serienan awor aki Empire. E ta hasiendo hopi kurso di Public Speaking aktualmente. I pa loke ta su estudio e lo ke bai den direkshon di sikólogo. El a konta Djasabra ku e gusta atendé ku hende i solushoná problema. E ta gusta duna konseho.

 

Sali pa bo soño….

Pa loke ta e ehèmpel ku e ke ta pa hóbennan, Titi a bisa Djasabra ku e ke ta e Titi ku e hóbennan ta wak pa beyesa  i tambe e Titi ku ta studia. Manera el a bisa, nos hóbennan mester kere den nan mes. Siña i bai pa nan soño i loke e hóben ke hasi e lo haña tempu pa esei. E hóben tin di sali pa su soño i yega un kaminda ku nunka ela pensa ku el a yega. Si e wak su mes tempu e tabatin 8 aña, nunka el a pensa ku e lo a yega na ta Miss Curaçao Teenager. Esei e ke pa nos hóbennan wak e komo ehèmpel pa sigui pa nan soño i no djis pa ta un bunita kara. E ke duna konseho pa e hóbennan sali pa nan soñonan. Tin hopi hóben positivamente besig pero falta mas. I ta netamente den e direkshon aki Titi ke bai, e ke ta un bos pa nos hóbennan.

 

Limitá…..

Loke ta stroba hóbennan di logra loke nan ke segun Titi ta ku e hóbennan ta limitá nan mes hopi. Tambe hóbennan ta afiliá nan mes ku e grupo robes i ta bin aserka e forma negativo ku ta usando Retnan sosial siendo por us’e di forma positivo tambe. “Kaminda di us’e negativo, ban us’e positivamente” ta Titi su petishon na nos hóbennan.

 

Mamanan; pone mas atenshon na bo yu….

Titi a manda un mensahe pa mayornan. “Mamanan mester pone mas atenshon na nan yunan pasobra hopi mucha mester di atenshon na kas i tin falta di amor”. E ta spera ku tiki tiki bin kambio den eseinan. I ounke e situashon na Kòrsou ta eksigí pa mama i tata ta traha konstantemente, Titi ta kere ku no mester pèrdè for di bista ku e adulto mester ta ehèmpel pa su yunan. “Duna bo yu amor i konseho i nunka mand’e sera boka”, Titi ta kere. El a bisé ku e sèn no ta trese amor.

 


Pronto den eksterior pa representá Kòrsou…

T’keyah lo bai representá Kòrsou den eksterior pero e no kier a slèk konta nos nèt nèt nada di unda e lo bai. E a wanta tur kos komo un sorpresa, manera e mes a bisa. Kòrsou su yunan ta hasiendo hopi kos positivo den eksterior i Titi ke forma parti di e grupo positivo di yunan di Kòrsou ei ku tambe ta yuda pone Kòrsou su nòmber aun mas riba mapa. E tin konfiansa den su mes pasobra eifó tin hopi beyesa pero e tin konfiansa den su mes ku e lo ta un digno representante di nos pais.

 

Nos laman ta nos atrakshon….

I e loke mas ta atraé Titi pa e por bende Kòrsou eifó ta nos laman. E bunitesa di nos laman ta diferente. I esei ta loke ta atraé turismo. Nos kultura ta dushi i esei e ke bende Kòrsou afó pa trese mas turismo pa nos isla. Komo hóben hopi biaha nan no ta wak kuantu talento tin, pero mester buska pa wak kuantu talento tin. E mes ta awor partisipando den e sertámen di beyesa el a konosé mas artista ku tabata biba den eksterior i a bin Kòrsou.

 

Bai pa bo soño….

Oro siman nos hóbennan ta sali pa eksterior pa sigui ku nan estudio. Titi su mensahe na nos hóbennan ta “tin konfiansa den boso mes pasobra ora bo ta den e mundu eifó ta ku e konfiansa ei, kere den bo mes sino otro lo no kere den bo, i ser fuerte mentalmente. Hasi loke bo ta kere ta bon, sali pa bo soño i no laga nada stroba bo i para bu”, Titi a terminá bisando.

 

LAGA UN KOMENTARIO

Please enter your comment!
Please enter your name here