WILLEMSTAD – Hof a kaba di sentensia e eks bankero di Giro Bank, Eric Garcia na un kastigu di prizòn di 4 aña i tambe ku e mester paga 19 mion florin bek. Ademas e tin ku bai prizòn bek mas lihé posibel i ku esaki ta pone un fin na su aresto na kas.
Garcia a apelá e sentensia di 4 aña di prizòn, mas 19 mion florin ku e lo tin ku paga bèk, sino e tin ku sinta 3 aña mas. Pues tur kos a keda igual. Garcia mes a deklara anteriormente ku e kastigu ta demasiado haltu pe.
El a atmití ku tur loke el a keda akusá di dje ta kuadra, pero e ke wak tòg si por hasi algu ku e 4 aña di kondena.
Garcia a keda kondená pa malversashon komo curator, falsifikashon di dokumentonan di banko Maduro na nòmber di Banco Maracaibo N.V. i tambe labamentu di plaka.
Tur esakinan den e periodo di 1 di yanüari 2010 te ku 20 di yüli 2016 na Kòrsou i tambe Estádos Unídos.
Segun e akusashon, Garcia lo a malversá un montante di 11 mion dòler merikano for di Banco Maracaibo N.V., perhudikando 1500 persona.
De edishon di imprenta di EXTRA mayan lo tin detaye amplio riba e kaso aki.
