Despues ku abogado Dickens a bisa ku no tin prueba ku e akusado ta esun ku a tira
WILLEMSTAD.- Dia 29 di sèptèmber último abogado general den korte di apelashon, a bolbe hasi demanda di 9 aña pa A. Bolanos (27), akusá di a tira riba M. Reyes dia 14 di yüni 2020 na altura di “Club Mulata” na Rooseveltweg. Bolanos ta keda akusá pa intento di asesinato, maltrato grave, poseshon di arma i poseshon di 491 gram di mariwana.
E víktima a haña bala ku a alkans’é na su igra, pulmon i stoma.
Durante entrada hudisial na kas di e akusado, polis a haña un kantidat di mariwana i un telefòn. Den e telefòn nan a haña vários foto, entre nan un foto di e akusado kaminda polis ta bisa di por mira klaramente ku e tabatin un arma den su karson.
Banda di esaki nan a haña algun potrèt i video kaminda e akusado tin vários tipo di arma ta “show” kuné.
El a keda kondená na 9 aña den korte di promé instansia pa e kaso aki. E akusado tin 2 aña será, pendiente tratamentu di su kaso den korte di apelashon. Bolano a apelá su sentensia, pa motibu ku e ta insistí di no ta esun ku a tira riba e víktima i nunka tabata den poseshon di arma di kandela. El a splika ku e fotonan di a arma ku nan a haña den su telefòn tabata na Venezuela. E tin un famia polis i a tuma su arma pa saka potrèt kuné. Pa loke ta e akusashon di 491 gram di mariwana ku polis a haña na su kas durante entrada hudisial, el a bisa ku esei ta pa su propio uzo.
Durante tratamentu di e kaso den korte di apelashon dia 29 sèptèmber último, abogado mr Dickens a trese vários punto dilanti den su defensa i a bisa entre otro, ku no por prueba ku su kliente tabatin arma kandela, te p’e t’esun ku a tira. Segun e abogado no a hañ’e tampoko ku arma di kandela.
Esaki ta pone ku e abogado a pidi korte di apelashon pa apsolvé su kliente di intento di asesinato i poseshon di arma.
Korte di apelashon mester a tuma un desishon dia 20 di òktober binidero, pero ayera a manda un karta pa Ministerio Públiko ku mester pone Bolanos inmediatamente den libertat, pendiente e desishon di e tribunal di Hof.
