Hóben tabata kore “roekeloos” i sin lus riba kaya
ORANJESTAD.-Polis di Aruba ta informá ku awe mainta hopi tempran, alrededor di 5’or, patruya polisial di Noord a mèldu na sentral di polis ku nan ta den persekushon di un outo Toyota Vitz. Ta asina ku a topa e outo Vitz ta kore sin lus i di forma hopi iresponsabel riba kayanan. E shofùr tabata manehá e vehíkulo “roekeloos” i esei tambe a pone ku polis a duna òrdu pa para, pero e shofùr no a sigui òrdu di polis i ora esei no a sosodé a kuminsá un persekushon.
Na altura di Madiki a purba para e outo, pero segun e promé informe e shofùr lo a manda outo riba polis. Polis na su turno lo mester a tira i esaki lo a alkansá e shofùr maskulino.
Polis a pidi ambulans ku urgensia i tambe hefenan pa bai na e sitio. Ambulans a yega na e sitio i a brinda asistensia na e shofùr, pero lamentablemente no por a hasi nada mas pe.
Dòkter forénsiko a presentá na e sitio tambe i a konstatá morto di e e hòmber A.C.L. di 19 aña. Polis tékniko, slachtofferhulp i otro outoridatnan a presentá na e lugá pa hasi nan investigashon. Meskos ta e kaso ku funshonarionan di Landsrecherche ku tambe tabata presente pa hasi investigashon debí ku ta trata di un kaso ku embolbimentu di agentenan polisial. Bosero di polis di Aruba ta indiká ku no por duna mas detaye awor aki mirando ku e kaso ta bou di investigashon.
 a muri den persekushon){kind=link}