MONSEY, NEW YORK, MERKA, AP.- Un hòmber a drenta den kas di un rabino i a hinka sinku persona miéntras nan tabata selebrando Hanukkah den un komunidat hudiu òrtodòks na nort di New York.
Polis a buska te na Manhattan i a logra detektá e sospechoso ku a purba hui. Nan a arest’é algun ora despues di e atake di djasabra anochi na Monsey. Grafton E. Thomas tabata kubri na sanger na momentu ku agentenan a deten’é, segun señalashon di e fiskalnan.
Presidente Donald Trump a sensurá e atake horibel, afirmando den un tweet ku “nos tur mester uni pa kombatí i eradiká antisemitismo”.
Thomas a presentá den korte i a deklará inosente di e sinku akusashonnan di intento di asesinato. Hues a fiha un fiansa di sinku mion dòler i e ta detené aktualmente.
FBI a pidi un òrdu hudisial pa haña su kuentanan online i a revisando evidensia digital, segun indikashon di e agente. Aparte di esaki, ta eksaminando si e sospechoso ta sufri di enfermedat mental.
Un persona a resultá gravemente heridá, segun indikashon di gobernador Andrew Cuomo. E yu di e rabino tambe a sufri leshon. Outoridat no a duna un posibel motibu pa e atake.
