PRAGA, REP. CHEKA (AFP).- Un hóben di 24 aña, a mata ku un arma di kandela 15 persona den un universidat di Praga promé ku polis por a elimin’é.
E tiroteo a tuma lugá na e fakultat di Arte di Charles University, situá den e sentro históriko dje siudat.
“No tin ningun indikashon ku e krímen aki tin relashon ku terorismo internashonal”, segun e minister cheko di interior, Vit Rakusan.
Segun un komunikado di polis, “mas di 15 persona a pèrdè nan bida i sigur 24 otro a keda heridá. Durante e tiroteo, polis a rondoná e aria i finalmente a eliminá e atakante.
Outoridatnan a bisa ku promé ku e matansa, ya nan tabata buska e hóben despues di a haña esaki su tata morto. A bai buska e agresor na e universidat, pero no a logra hañ’é na tempu pa evitá e tiroteo.
