Esaki ta di tres asesinato di 2022
ORANJESTAD.-Polis di Aruba ta informa ku den oranan di mardugá tras di lomba, mas o ménos 01:25 sentral di polis a risibi informashon di un kaso di tiramentu ku a tuma lugá. E orígen di esei ta un pelea na altura di e sitio unda tabata Sand Bar na Palm Beach na nort. Sentral di polis a dirigí un patruya ku urgensia pa e sitio. Na yegada e polisnan a topa un situashon kaótiko i mester a pidi refuerso di polis pa kontrolá e situashon.
Polisnan di Oranjestad, Santa Cruz, Noord, San Nicolas i RRT a bai duna asistensia. Ambulans tambe a yega hopi lihé na e sitio i a hiba e víktima ku urgensia pa hospital.
Sin embargo na yegada dòkternan no por a hasi muchu mas. Pa 01:36 dòkter a konstatá morto di e víktima Anthony A. Carty nase na Aruba di 31 aña di edat. A sera e área unda e kaso e tuma lugá pa asina reshèrshi por hasi nan investigashon.
Un ratu despues polisnan di RRT a detené un persona na un apartamentu na Saliña i a konfiská un Toyota Vitz pendiente di mas investigashon. Polis di Aruba ta informa ku esaki ta di tres kaso di asesinato di 2022.
