Vershon polisial:
Djaweps 3 di sèptèmber 2026 alrededor di 03.50’or, Sentral di Polis a dirigí un unidat di Rio Canario pa un kompleho di apartamentu riba F.D. Rooseveltweg pa un kaso di maltrato ku a terminá den un edifisio na kandela.
Na yegada di e unidat el a tuma nota di desaroyo di huma i mesora a pidi presensia di brantwer pa asina por paga e kandela.
Polis a pidi tur habitante di e kompleho di e apartamentu na e momentu ei pa nan bandoná e edifisio pa nan mes seguridat.
For di investigashon preliminar a resultá ku un pareha ku ta biba den e kompleho tabatin un diskushon basta fuerte ku otro i despues testigunan a mira nan bandoná e kompleho. E dama tabata na sanger i polis a konstatá manchanan di sanger riba suela i tambe riba trapi di e edifisio.
Despues di huida di e pareha, e kompleho tabata na kandela.
Brantwer ku a yega rápidamente a paga e kandela, pero no por a evitá ku un di e apartamentunan a kima kompletu mientras algun otro a sufri hopi daño di awa.
Investigashon den e kaso aki ta kontinuá.
WILLEMSTAD – Un notifikashon di un posibel kaso di maltrato ku a drenta na Sentral di polis alrededor di 4or di mardugá por poko a bin terminá awe mainta den un drama kompleto. Segun e promé informe no ofisial, un hòmber di orígen haitiano lo a intentá pega su pareha na kandela den un kompleho di apartamento riba F.D. Rooseveltweg na Palu Blanku, pega ku Tu y Yo na Sta. Rita. E situashon a resultá den un kandela ku a afektá dos apartamento i a obligá polis pa evakuá 15 famia di forma urgente. Durante e kandela, un dama ku tabata riba e piso ariba a keda pega, pasobra e vlamnan tabata hasi imposibel pa baha pa su mes. Brantwer a duna asistensia pa saka e dama for di e lugá.
Tantu brantwer Rio Canario i Brantwer Mundo Nobo a bai pa atendé e kandela. Na yegada, bomberonan a topa ku dos apartamento na e parti ariba di e edifisio tur na kandela, ku vlamnan grandi tabata saliendo for di e edifisio.
Segun informashon ku EXTRA a risibí, e kandela ta relashoná ku un situashon di violensia entre un hòmber i su pareha. E hòmber, di orígen haitiano, lo a intentá pega su pareha na kandela den e apartamento. Polis no a bin topa niun rastro di e pareha aki i awor un buskeda lo inisia pa detenshon di e homber pa asina por duna kuenta rason di su akto kriminal.
Debí na e peliger ku e kandela tabata representá pa varios residente i otro apartamento, polis a mester evakuá 15 famia urgentemente for di e kompleho.
Kuerpo Polisial Kòrsou ta investigá e kaso pa determiná eksaktamente kiko a tuma lugá den e apartamento i kon e kandela a kuminsá. Tambe lo tin un investigashon profundo pa determiná e responsabilidat di e hòmber i tur e sirkunstansianan rondó e intento alegá pa pega su pareha na kandela.
