WILLEMSTAD – Den oranan di mardugá Polis mester a bai ku urgensia na Playa Sta. Cruz despues di risibí informashon ku lo tin un persona ta drif den laman. Un piskadó ku a bai baha su boto pa bai piska a bin topa ku e situashon. Na yegada di e patruya, polisnan a konstatá ku e víktima, un hende homber ya no tabata duna señal di bida. Mesora a pidi mas asistensia pa por kuminsá ku investigashon rondó di e morto.
E situashon ta lanta hopi pregunta, ya ku den e área Polis a topa tambe un outo Hyundai stashoná. Durante kontrol di e vehíkulo, Polis a konstatá sanger riba stul di pasahero dilanti. Ademas, yabi di e outo tabata poné riba baul di e vehíkulo.
UPDATE Polis a splika awe den un komunikado di prensa e siguiente:
“Djabièrnè 25 di sèptèmber 2026 alrededor di 03.25’or, Sentral di Polis a risibí informashon di un kurpa sin bida den laman di Playa Sta. Cruz. Na un distansha riba e playa tabatin un outo tambe den kua tabatin sanger.
Unidat di warda di polis di Barber a bai na e sitio i na su yegada, el a topa ku e kurpa di un hende hòmber ku tabata drif i un outo ku sanger den dje. Huntu ku personal di Wardakosta a saka e kurpa for di den awa i pon’é na kantu pa evitá ku e ta sigui drif bai pafó. E víktima tabatin herida na su kabes.
Dòkter di polis ku a yega na e sitio, a konstatá morto di e hòmber. Riba òrdu di fiskal di Ministerio Públiko a konfiská e kurpa. E outo den kua tabatin sanger tambe a keda konfiská pa mas investigashon. Un yamada ta bai na kualke persona ku den oranan di mardugá a tuma nota di un òf otro situashon sospechoso na Playa Sta. Cruz òf den besindario, pa tuma kontakto ku polis na 917 òf 108.”
