WILLEMSTAD.-Outoridatnan na Ulanda ku ta investigando kasonan di mal uso di sistemanan di pago sosial na Ulanda tin man yen di persona, inkluso kurasoleñonan ku ta sali for di Ulanda i trata di sigui kobra loke nan ta haña na yudansa. Den último añanan tabatin un gran kantidat di kaso di hende konosí ku a bai Ulanda, inskribí aya i bin na remarke pa diferente prima. Despues di tempu sinembargo nan a bin Kòrsou bèk i trata di mantené e yudansa ku nan tabata haña for di distansia.
Den promé instansia esei tabata relativamente fásil komo ku e kontròl no tabata efisiente i si tabatin kòntròl mes esei tabata tuma lugá tur aña. Despues ku a detektá un kantidat kresiente di kaso, a baha e tempu di kontròl te 6 luna. Ultimamente a bah’é te na 3 luna. Loke hopi hende tabata hasi den práktika den pasado ta ku nan ta bin Kòrsou bèk i ora ta nèt yegando e periodo di 12 luna i despues 6 luna, nan tabata regresá Ulanda pa mèldu. Despues nan tabata regresá atrobe te na e próksimo kòntròl. Awor aki ku e kontròl ta tres luna a bira ménos atraktivo pa sali i bolbe bai Ulanda pa bolbe regresá Kòrsou.
Na tur manera outoridatnan na Ulanda ta tratando pa evitá mal uso di e provishonnan aki ku ta kostando algun mil mion florin. Por ehèmpel pa migrantenan awor aki haña yudansa, nan mester tin nan mes adrès. Algun munisipio tin komo regla ku ta despues di 6 luna bo ta bin na remarke pa haña yudansa. Esei ta hinkando yen di yu di tera den problema ku sin informashon ta biaha bai Ulanda.
Na Almere a kuminsá investigashonnan amplio riba e fenómeno di froude sosial, segun e wèpsait
www.binnenlandsbestuur.nl a informá a siman aki. Ta investigando un gran kantidat di kaso di froude sosial spesífikamente riba hendenan ku ta haña sèn for di loke ta konosí komo Participatiewet-uitkering pero ku tin propiedat tambe den eksterior. Den e promé fase a detektá 573 kaso dudoso. Un di nan a resultá un persona ku ta kobra su provishon sosial na Ulanda pero tin un propiedat di 243 mil euro na Kòrsou.
Un di e aspektonan ku ta investigá ta uso di awa na Ulanda. Si durante un periodo spesífiko bo ta kobra e provishon pero no tin uso di awa na bo adrès, di mes ta trata di un kaso sospechoso. Tambe a detektá kaso di hendenan ku ta keda na otro lugá na Ulanda ku no ta na Almere. Den kaso hopi grandi ta pidi yudansa di Internationaal Bureau Fraude-informatie, un ofisina speshal pa e tipo di kasonan aki. Por sierto ku e investigashon na Almere no ta dirigí riba kurasoleñonan so pero riba tur nashonalidat, ulandesnan mes tambe.
