PORTABELO, PANAMA.- Na 11 meter di profundidat dilanti di kostanan di Panamá, e aleman Rudiger Koch ta biba pa dos luna kaba den un kápsula konbertí den loke e ta konsiderá komo un kas di futuro konstruí den laman Karibe.
Ku su aventura insólito, ku e ta pretendé di sigui pa dos luna mas, e ingeniero aéreo espasial, di 59 aña, ke gana un puesto den rèkòrt di Guinness i demostrá ku por biba masha dushi mes i traha bou di laman.
“Trasladá nos mes pa osean ta algu ku nos mester hasi. Aki bou ta muchu mas trankil, no ta manera bida den siudat. Loke bo ta skucha ta e olanan i e zonido di piskánan”, segun Koch a bisa na periodistanan.
E konstrukshon di 30 m2 tin un wc portátil, un kama, un televishon, un kòmpiuter, un baiskel státiko i algun fèn. Tambe internèt ku satélite i uso di energia solar, ounke tambe e tin un generator di koriente. Pero e no tin ducha.
“Mi ta lanta 6’or, sigui notisia, traha un poko i despues ta prepará desayuno i sigui ku mi kosnan diario”, Koch a konta. Riba un mesa tin un ehemplar di su buki faborito: “Twenty Thousand Leagues Under the Sea”.
Atmirador di captain Nemo, Koch a start su reto dia 26 di sèptèmber i tin intenshon pa sigui te 24 di yanüari pa superá e rèkòrt komo e persona ku mas tantu tempu a pasa bou di awa sin aparatonan pa baha preshon di aire. Aktualmente e título ei ta den poder di Joseph Dituri, kende a pasa 100 dia den un konstrukshon similar den lago di Florida.
Dos oloshi digital di un meter kada un ta marka e dianan, minütnan i sekòndenan ku e ta bou di awa i e kantidat ku e falta.
Kuater kámara na tera ta vigilá pa konfirmá ku e no ta abortá su mishon i ku tur kos ta kana bon. Ariba den e kas, e israelí Eial Berja, eksperto di seguridat, ta kontrolá su movementunan for di un pantaya”
Koch ta risibí kuminda for di eksterior i ta haña bishita di un dòkter i su dos yunan. “E último biaha ku m’a mir’e, ainda e tabata kasá”, segun el a hasi chansa refiriendo na e próksimo bishita di su kasá tailandes.
Koch tin planiá kaba lokual ta e promé kos ku lo e hasi una bes e ta bèk riba tera. “Lo mi dal un bon baño, di un ora mas o ménos”, segun el a komentá.
