Resientemente polis a hasi detenshon di e hòmber J.A.J. di 37 aña relashoná ku maltrato i menasa.
Polis mester a bai na Kaya Zusternan di Schijndel (Pietermaai) na e Sentro di Bario, pa un kaso di maltrato i menasa.
Investigashon ku polis a hasi na e sitio, ta indiká ku e hòmber sospechoso J. nasé na Jamaica, a tuma pa kustumber di drumi bou di e dak di e Sentro di Bario di Pietermaai.
Na momentu ku e persona ku ta enkargá ku e sentro a bai lanta e hòmber aki pa kit’é for di e sitio, e sospechoso a rabia asina tantu i kuminsá manda e hòmber ku piedra i a heridá esaki na su dede. Banda di esaki, el a menasá su víktima tambe.
Esaki a pone ku polis a detené sospechoso pa maltrato i menasa.
Durante di su detenshon, e sospechoso a bringa ku polis tambe i tabata nesesario pa a kibra e resistensia aki.
A presentá e sospechoso dilanti di un fiskal ouksiliar ku a ordená su enkarselashon pendiente di mas investigashon.
