TOKYO, AP.- Polis hapones a arestá un merikano debí ku el a hinka su kasá hapones mata den korte di divorsio, segun indikashon di funshonario i medionan.
E sospechoso di 32 aña a hinka su kasá den garganta na entrada di e tribunal di famia na Tokyo, segun indikashon di polis. Outoridat no a revelá identidat di e agresor pa motibunan relashoná ku su estado mental i a bisa ku e motibu pa e atake no ta konosí.
E víktima, identifiká komo Kyoko Wilson, di 31 aña, a wòrdu transportá pa hospital, kaminda el a muri, segun indikashon di outoridat.
Reporteronan a mustra polis i seguridat serando e área di e krímen. Un video aéreo a mustra e momentu kaminda e sospechoso a wòrdu detené den un parke despues ku el a skapa. Riba e video, e sospechoso tabata drumí riba flur i rondoná pa polisnan.
E agresor tabatin tres kuchú i el a ataká su kasá na momentu ku esaki a drenta den e edifisio, segun indikashon di e kanal di televishon estatal NHK.
