NORFOLK.- Brian Walshe a mata i kap su kasá Ana Walshe na pida i a tira e kurpa den landfill pa motibu ku e kier a terminá nan matrimonio, asina un fiskal di e distrito di Norfolk a duna di konosé e siman aki. “En bes di divorsio, ta parse ku Brian mas bien kier a deskuartisá Ana i deshasí di su kurpa”, asina e fiskal Lynn Beland a deklará. Den e akusashon ku a keda presentá den e kaso aki ta ser bisá ku Brian Walshe a ataká i bati su kasá te ora ku esaki a muri.
Miéntras Beland tabata lesa e akusashonnan i e posibel motibu, Walshe (47) a keda opservá i skucha. E ta ser akusá di asesinato i deshasí di un kurpa sin tabatin outoridat pa esei. E ta den prisòn for di dia 8 di yanüari despues ku el a ser detené i akusá di a pone investigadónan riba ruta robes en buska di su kasá.
Den e okashon aki tabata e promé biaha ku fiskal a duna di konosé ku Ana Walshe (39), mama di tres i ku tabata pèrdí for di Aña Nobo, a fayesé. Fiskal no a bisa ku nan a haña e kurpa.
Di akuerdo ku un video ku Ministerio Públiko tin, a kapta Brian ta karga sakunan pisá ta tira na landfill na Abington i tambe na Swampscott, miéntras ku datonan di su telefòn selular ta indiká ku e tabata na e landfill banda di kas di su mama na Swampscott.
E sakunan na Abington a ser destruí kaba na momentu ku polis a lokalisá nan. Sinembargo e sakunan na Swampscott si a keda deskubrí i tabatin markanan di sanger, produktonan di limpiesa, un zag eléktriko, hacha, sapatu i un kartera den kual tabatin e karchi di vakunashon di Ana Walshe. E laboratorio di estado a tèst algun parti di e kurpa ku a haña DNA di Ana di Brian Walshe.
