WILLEMSTAD.- Un hòmber ku tabata na un minimarket den área di Boca a resultá heridá despues ku un otro persona lo mester a tira.
Segun bosero di Kuerpo Polisial di Kòrsou Alto Inspektor sr. Maurits Rosalina a konfirmá na EXTRA, tur kos a kuminsá ku un diskushon ku tabatin na un Minimarket na Boca. Dado momentu un hòmber a saka un arma di kandela i lòs tiru dirigí riba e víktima. E víktima a purba kore pero den Kaya Angua di Reda el a sak den otro debí na e tirunan risibí. Dos ambulans a keda dirigí na e sitio mirando e situashon ku e víktima tabata aden.
Paramédikonan a stabilisá e víktima i despues a transport’é ku urgensia pa departamentu di emergensia di CMC pa tratamentu médiko avansá. E víktima su situashon ta di atenshon.
Polisnan a sera e área kaminda e kaso mes a tuma lugá pa asina por realisá e investigashonnan nesesario.
