LOUISVILLE, MERKA, AFP.- Un empleado bankario di 25 aña a basha bala na su trabou djaluna na Louisville, den e estado merikano di Kentucky, matando kuater persona i heridando nuebe gravemente den un atake transmití bibu promé ku polis a tira i mat’é.
Polis a identifiká e atakante komo un hòmber blanku ku yama Sturgeon Connor i a bisa ku e tabata un empleado di Old National Bank, kual ta keda den e sentro di siudat di mas grandi di Kentucky.
Despues ku polisnan a haña un notifikashon di un tiroteo 8:38 or di mainta, polis a yega e sitio den tres minüt. E sospechoso a tira riba e ofisialnan, kual na nan turno a tira i mata e atakante, segun indikashon di e hefe di polis interino, Jacquelyn Gwinn-Villaroel den un konferensia di prensa mainta.
Gwinn-Villaroel a konfirmá ku e hòmber a transmití e atake bibu riba Instagram.
Un bosero di Meta a bisa na AFP ku e empresa ta den kontakto ku polis i a eliminá e transmishon bibu aki rápidamente den oranan di mainta.
No tabatin informashon inmediato tokante e motibu di e atake, pero CNN a sita un fuente polisial ku a bisa ku el a kaba di wòrdu informá ku e lo a pèrdè su trabou.
