PARIS, AP.- Outoridatnan di sùit di Fransia a detené un marokano ku a hinka un muhé i su tres yunan djamars den un sentro di fakansi den Alpen. Esaki a kousa pániko den un pais ku ta rekuperando di un terser atentado den 18 luna.
Jean-Marc Duprat, visealkalde di e siudat Laragne- Monteglin, den e region Hautes-Alpes, a informá ku e mama i su tres yunan di 8, 12 i 14 aña tabata di fakansi den e sentro na momentu ku un hòmber den un otro kamber a ataká nan djamars mainta miéntras nan tabata desayuná.
E vise-alkalde a bisa inisialmente ku e hòmber tabata rabiá debí ku e muchanan tabata bistí ku karson kòrtiku i kamisa pero despues el a bisa ku esaki no ta bèrdat i ku e motibu di e atake no ta konosí.
“Na e momentunan aki nos no tin un kontesta kla”, segun Rahael Balland, fiskal di e region.
Balland agregá ku e atakante, kende tabata di fakansi ku su kasá i yunan, tabatin un kuchú di 8 centimeter.
E yu muhé mas chikí, kende a sufri heridanan mas grave, tabata for di peliger despues di un operashon den e hospital di Grenoble, segun Dupprat. Su mama i dos rumannan ta rekuperando, serka di e sitio kaminda e atake a tuma lugá.
This function has been disabled for èxtra.