Nigeria ta un dje paisnan afrikano kaminda gruponan rebelde konstantemente ta enfrentá i mata siudadanonan inosente. Esaki atrobe ta e kaso den último dianan.
KANO, Nigeria (AFP).- Hòmbernan armá e siman akí a mata den kareda di 60 persona den vários siudat den nortwèst di Nigeria, segun organisashonnan di misa i humanitario. E pais afrikano ta enfrentá hopi inseguridat den parti nort ku ta dominá pa prinsipalmente musulmannan. E atakenan a ekstendé pa dos siudat bisiña, Kebbi i Niger.
E reportahe a señalá ku a registrá 20 morto den un atake den e zona di Shiroro. E atakantenan tabatin armanan sofistiká ku kua nan a invadí un kampamentu militar. Polis a konfirmá e atake den Shiroro i a reportá otro tres morto.
E distrito Shiroro ta blanku konstante di gruponan kriminal konosí komo “bandidunan”, i tambe yihadistanan. Tur dos grupo ta hasi nan mes kulpabel na agreshon konstante di siudadanonan. Otro lider kristian a referí na kantidat di 40 víktima.
Polis a responsabilisá e atakenan den Kebbi na un grupo yihadista lokal konosí komo Mahmuda. E grupo aki, ku ta aktivo den nortwèst di Nigeria, ta vinkulá ku Mahmud al Nigeri, un dje lidernan dje grupo yihadista Ansaru. E grupo aki a lòs su mes for dje movimentu Boko Haram i for di despues di esei ta aliado di e grupo Al Qaqida den Magreb Islamita.
E estado di Kebbi ta keda na e frontera di Nigeria ku dos ais, Benin i Niger, i for di 2025 ta ophetivo di kantidat kresiente di atakenan yihadista.
