E diferente tiponan di bistí na kua hende muhé na Afganistan mester atené su mes.
HERAT, AFGANISTAN (AFP).- Hòmbernan afgano a manifestá ayera na Herat, den wèst di Afganistan, kontra di e restrikshonnan nobo imponé riba hende muhé den e pais. Desena di hòmber a bini huntu durante di tres dia, despues ku polis di moralidat dje gobièrnu talibán a detené e hendenan muhé ku no tabatin “hijab” (bistí pa tapa hinter kurpa) òf burka (tapa hinter kurpa, inkluso kara). Na Afganistan e hende muhé mester kubri su mes di kabes te pia ora ku nan ta sali kas.
Un manifestante di 33 aña a bisa ku forsanan di seguridat “a usa palu, zuip i arma di kandela pa kore ku e multitut. Inkluso a tira den aire”. Den deklarashon na AFP, polis a nenga di a usa arma i a akusá e manifestantenan di ta stroba órden públiko.
Protestanan no ta algu normal na Afganistan, kaminda talibannan ta goberná for di ougùstùs di 2021 i ta apliká un interpretashon hopi estrikto di e lei islámiko.
Riba X, Richard Bennett, un funshonario spesial di Nashonnan Uní riba derechinan humano na Afganistan, a bisa di ta ”alarmá pa e uso di forsa eksesivo kontra di manifestantenan pasífiko den Herat”. Un otro persona a trese dilanti ku afganonan hòmber ta protestá komo apoyo na e hende muhé.
E hòmbernan a reuní na un sitio despues di un anunsio riba retnan sosial ku tabata pidi abitantenan pa “defendé e derechinan “ di hende muhé. Said Massud Husaini, bosero di polis di Herat, a akusá nan “di purba na reuní i krea tenshon bou di preteksto di protestá kontra temanan relashoná ku kumplimentu dje kódigo di bistimentu di hiyab” òf un velo islámiko ku ta tapa kabei.
