Un karosa inmenso a habri karnaval di Rio de Janeiro, presentando e presidente brasilero Inacio Lula da Silva.
BRASILIA (AFP).- “Olé, olé, olé, olá, Lula, Lula!”. Ku e kantika akí, a kuminsá un homenahe na e presidente brasilero den karnaval di Rio, meimei di krítikanan di oposishon ku a reklamá ku ta trata di propaganda polítiko den aña di elekshon. E desfile dje 12 prinsipal skolnan di samba – un kompetensia feros ku karosanan gigante, perkushon i reinanan di samba ku masha tiki paña na kurpa – ta e plato prinsipal di e karnaval di Rio de Janeiro.
“Académicos de Niteroi”, e promé skol di samba pa desfilá, a disidí na homenahiá Inacio Lula da Silva i esaki ta e promé biaha ku un presidente den funshon ta opheto di homenahe den e famoso avenida di Sambodromo. E mandatario iskierdista a mira esaki for di tribuna VIP huntu ku alkalde di Rio, Eduardo Paes.
E espektákulo dje grupo, ku alrededor di 3.000 persona, a presentá vários esena dje bida di Lula, for di su komienso humilde den nortost di Brasil te na momentonan klave di su bida polítiko. Pero tambe e grupo a pone atenshon na su máksimo rival polítiko, Jair Bolsonaro, ku nan a presentá komo e payaso “Bozo”, manera algun iskierdista ta referí na e èks-presidente, i kende nan a presentá entre trali di un karosa i ku un banchi elektróniko na ènkel.
Oposishon a denunsiá e desfile komo un akto di kampaña promé ku esaki kuminsá di forma ofisial na ougùstùs benidero, ora ku Lula (80) buska un di kuater mandato.
E protesta a bai korte, pero Tribunal Supremo Elektoral di forma unánime a rechasá e puntonan presentá pa dos partido di oposishon pa impedí Académico de Niteroi pa desfilá loke oposishon a konsiderá komo un “kampaña elektoral antisipá”.
