COMAYAGUA, HONDURAS.- Un sosio dje eks presidente hondureño Juan Orlando Hernández, kondená pa narkotráfiko na New York, a keda entregá na Merka, un siman despues ku e mandatario iskierdista Xiomara Castro a pone fin na e tratado di ekstradishon entre ámbos pais.
Mario José Calix a keda entregá na polisnan norteamerikano na e aeropuerto di Palmerola i nan a subié den avion ku a sali rumbo pa Merka.
E supuesto narko, di 42 aña, a keda trasladá ku mannan di bui for dje prizòn di Forsanan Spesial di Polis den e kapital, kaminda e tabata será for di yüni.
E ekstradishon di Calix probablemente ta e delaster for di Honduras pa Merka, despues ku e tratado entre e dos paisnan a keda kanselá, segun e bosero di Poder Hudisial, Melvin Duarte.
Solisitá den 2019 pa Merka bou di sospecho di tráfiko di droga, Calix a keda kapturá dia 21 di yüni, un hues a outorisá e entrega na Merka dia 16 di ougùstùs.
Castro a ordená pa denunsiá e tratado despues ku e embahador norteamerikano na Tegucigalpa, Laura Dogu, a kritiká un reunion di hefenan castrense hondureño inkluyendo un subrino dje presidente ku un minister venezolano sanshoná pa Merka pa narkotráfiko.
Sinembargo, oposishon dje pais a denunsiá ku mandatario hondureño a pone fin na e tratado pa protehá miembronan di su gobièrnu i di su famia. Su kuñá Carlos Zelaya ruman di su kasá, e eks presidente Manuel Zelaya a keda akusá di a reuní ku narkotrafikantenan den 2013 pa finansiá e kampaña elektoral dje aña ei.
