Carmen Mejia kende e siman akí a rekobrá su libertat despues ku 22 aña pasá el a keda sentensiá na bida largu den prizòn.
HOUSTON, USA (AFP).- Un señora ku a pasa 22 aña den un prizòn di Merka akusá di a mata un mucha a keda liberá ayera, despues ku hustisia a determiná ku el a keda sentensiá ku testimonionan falsu i pruebanan inkompleto.
“Mi tabata fuerte… m’a kere ku sigur lo mi muri ayanan. M’a kere den Dios”, segun e hondureña, Carmen Mejia, a bisa na prensa djis un ratu despues di a bandoná prizòn. Pa motibu dje kondena ku el a risibí tabatin e òrdu di deportashon ora ku e sali liber, pero outoridatnan migratorio a kita esei despues dje sentensia nobo.
Mejia (54) a bisa di ke gradisí Dios i su abogadonan pa dun’é “un milager hopi grandi”. Mejia a risibí kadena perpetuo pa supuestamente a hinka un beibi di 10 luna ku e tabata kuidaden awa kayente. E mucha a muri debí na kimá ku el a sufri. Mejia a kai será, basá riba testimonionan di un dòkter i un eksperto, kendenan a sigurá ku e kemaduranan ku e beibi a sufri tabata kousá di forma intenshonal. Tambe el a pèrdè kustodia di su kuater yunan, kendenan a keda duná den adopshon.
Pero, su abogadonan, yudá pa ekspertonan médiko, a demostrá ku a trata di un aksidente doméstiko ku un aparato ku den algun sekònde a hisa temperatura dje awa na 60°C, na momento ku tabata bañando e beibi.
Den 2025, e dòkter Elizabeth Peacock kende a hasi e outopsia, a kambia determinashon dje kousa di morto, for di homisidio pa un aksidente. El a agregá ku e por a bisa ku tabata un aksidente si el a haña tur informashon disponibel.
“Nos ta di akuerdo ku e demandante a demostrá ku en realidat e ta inosente”, segun Korte di Apelashon Penal di Texas, den un informe di luna di yanüari último. E siman akí e wes, David Wahlberg, a lanta e akusashonnan i a duna e señora su libertat.
Segun e fiskal Sarah Byrom, “nada ku nos bisa ni ku nos hasi, no por restituí e tempu ku a kita for di dje ni drecha e doló di e separashon ku abo i bo yunan mester a soportá”.
