Un votadó hondureño ta tene e formulario di votashon di ayera na Honduras. Presidente merikano Donald Trump a pone preshon pa splika hondureñonan pa ken nan mester vota.
TEGUCIGALPA (AFP).- Hondureñonan ayera a vota pa eligí presidente i esaki bou di menasa dje mandatario norteamerikano, Donald Trump. E menasa a enserá ku Merka lo kòrta den yudansa dje pais pober den kaso ku e derechista Nasry Asfura no gana elekshon. Filanan largu te den oranan lat di atardi tabata sigui manifestá nan mes na algun urna, i komo tal Konseho Nashonal Elektoral a disidí ku urnanan por keda habrí un ora adishonal.
E gran inkognita ayera nochi tabata si e intervenshon di Trump lo surti efekto si e eks-alkalde i empresario Asfura (67) no gana elekshon. Si esei no ta e kaso, Washington “lo no gasta” rekursonan den e pais.
Asfura, di Partido Nashonal (PN), a figurá den enkuestanan den un empate tékniko ku e abogado iskierdista di 60 aña Rixi Moncada, dje gobernante Partido Libre, i ku e presentadó di televishon Salvador Nasralla (72), di e derechista Partido Liberal.
E elekshon lo disidí si e pais aki ku historial di froude i gòlpinan di estado, lo renobá konfiansa den su promé gobièrnu iskierdista òf lo sigui e pasonan di Bolivia i Argentina, di kende su presidente Javier Milei tambe ta respaldá Asfutra.
Den kareda di 6.5 mion hondureño a keda konvoká pa eligí e relevo di Xiomara Castro den un buèlta di elekshon, komo tambe diputadonan i alkaldenan pa un periodo di kuater aña. E kampaña a konta ku denunsianan antisipá di froude.
