HONG KONG, AP.- Un polis di Hong Kong a keda heridá ku un flecha den su pais. Outoridat a usa gas lakrimógeno i awa pa disolvé e manifestantenan ku a okupá campus di un universidat i un tùnel den e siudat. E agente a keda trasladá pa hospital, segun polis.
E uso di flecha, inkluyendo eksplosivonan fabriká na kas lo subi e nivel di violensia despues di mas di sinku luna di protesta kontra gobièrnu. E manifestantenan ta purbando di pone preshon riba e gobièrnu lokal, kual a rechasá mayoria petishon di e manifestantenan.
Un proposishon pa ekstraditá sospechosonan di delito pa China kontinental a inisiá e protestanan mas di sinku luna pasá. E gobièrnu a retirá e proposishon, pero e protestanan a evolushoná den un movementu di resistensia amplio kontra e kontròl di Beijing riba Hong Kong.
Un grupo grandi di persona a akudí na e sitio pa limpia un kaya serka di e campus, pero un grupo di manifestante a kore ku nan.
Legisladornan di oposishon a emití un komunikado kaminda ta kritiká Ehérsito chines pa uni e operashonnan pa limpia diferente kaya den e siudat. Ehérsito ta outorisá pa yuda mantené òrdu públiko, pero solamente si e gobièrnu di Hong Kong permití esaki. E gobièrnu a indiká ku no a pidi asistensia militar pa e labornan di limpiesa i a deskribí esakinan komo un aktividat komunitario.
