WILLEMSTAD.- Ofisina Sentral di Statistik (CBS) a kuminsá duna sifranan di Enkuesta di Forsa Laboral 2020 ku nan a realisá di 10 òktober 2020 pa 1 novèmber 2020. Loke a hala atenshon ta ku dje kantidat di alrededor di 30% di hende ku a pèrdè trabou dor di COVID, ta bisa ku nan ke haña trabou den sektor di Horeca.
Sra. Dianadira Eustatius-Martis, kende ta lider di proyekto dje enkuesta a duna un presentashon, kaminda el a splika ku durante e enkuesta a puntra e enkuestadonan ki impakto COVID-19 tabatin riba esnan ku ta traha i esun buskando trabou: 52,6% a bisa ku COVID-19 no a nifiká nada pa nan ku ta traha, pues nan no mester a entrega algu di salario òf oranan di trabou.
Pero 11,1% a indiká ku nan a pèrdè oranan di trabou pa motibu di COVID; 16,6% a indiká ku nan mester a entregá salario pa motibu di COVID; 6,4% a pèrdè nan kondishonnan sekundario dor di COVID. E kondishonnan aki por ta plaka di fakansi, serka ámtenar por pensa dianan di fakansi, bónus etc.; esnan ku ta traha riba nan mes i a keda kalifiká komo trahadó, 1,6% a pèrdè entrada/benta por ehèmpel esun ku ta limpia kura etc. pa motibu di COVID, distansia sosial e tabatin algun tempu ku e no por a traha; 3,4% a indiká algu otro. Nan a bisa ku durante COVID nan tabata na kas, pero despues a kuminsá traha bèk. Semper tin un grupo ku no ta haña un kontesta serka nan kual ta 8,3% ku ta deskonosí.
Por último a wak esnan ku a haña retiro dor di COVID: 11,1% a duna di konosé ku nan a haña retiro dor di COVID i 5,7% ta indiká no ta COVID ta motibu di retiro; esnan ku tabatin kontrato òf djòp, 8,6% a bisa ku nan a pèrdè esaki ta dor di COVID i 5,7% ta indiká ta otro motibu; negoshi ku a sera pa motibu di COVID ta 6,3% i pa otro motibu ta 3,8%; esnan ku ta buskando trabou nunka no por a pone nan den kategoria, i nan ta 4,4% ku a pèrdè trabou i e motibu ku ta buska trabou no por relatá na COVID un ehèmpel ta un mucha ku a kaba skol; i por último semper tin e grupo deskonosí.
Pues alrededor di 30% a indiká ku nan ta desempleá ta dor di COVID. CBS no a puntra nan unda nan tabata traha na momentu ku nan a pèrdè trabou. Pero esnan ku a indiká di ta buska trabou a puntra nan ki tipo di trabou i sektor ta buskando. Hopi ta bisa den direkshon di Horeca. Sra. Eustatius-Martis ta kere ku kisas e hendenan aki tabata traha den horeca kaba, i nan a pèrdè trabou den e sektor aki i p’esei lo ke bai bek den e área aki.

LAGA UN KOMENTARIO

Please enter your comment!
Please enter your name here