WILLEMSTAD.- E plan maestro di Waterfort Plaza a risibí hopi interes i, engeneral, reakshonnan entusiasmá durante e reunionnan públiko i e reunion ku gruponan di interes. Bishitantenan a ekspresá nan apresio pa e atenshon pa patrimonio, espasio públiko i e konekshon ku Punda. Na mes momento, a bini dilanti sugerensianan balioso pa sigui desaroyá e proyekto. Entre otro, a pidi atenshon spesial pa historia di lugánan spesífiko den e área, inkluso Plaza Cola Debrot, pa e ròl ku arte i kultura por hunga den e espasio públiko i pa e posibilidat pa públiko por bolbe disfrutá di e bista di Willemstad i su alrededor for di parti mas altu di e toren. E diseñadónan, Studio Akkerhuis i Lyongo Architecture, ta tuma e komentario- i sugerensianan akí i otro mas den e siguiente fase di desaroyo di e proyekto.
E reunionnan a duna tambe oportunidat pa kontestá pregunta i aklará duda òf informashon inkorekto tokante Waterfort Plaza. Ku un splikashon paso pa paso di kon e proseso a kana, ki investigashonnan a hasi i kua eskohonan ta sostené e plan maestro, bishitantenan a haña un mihó komprendementu di kon e plan a haña forma. E presentenan a apresiá e manera abrí ku a kompartí i spliká e informashon. Tambe a bira mas kla kiko e desaroyo por nifiká pa Punda, e patrimonio i komunidat.
E promé enkuentro tabata pa invitadonan for di diferente sektor i organisashon. Nan a risibí invitashon pa asistí na e presentashon tokante Waterfort Plaza, haña informashon tokante e plan maestro i hasi pregunta. E meta tabata pa trese diferente perspektiva huntu i duna espasio pa un kombersashon abrí tokante e plan, e puntonan di salida i e manera ku e área por sigui desaroyá. Un dia despues, públiko engeneral tabatin oportunidat pa pasa durante vários seshon di ‘walk-in’. Durante e dia, a duna e mesun presentashon na diferente ora, despues di kua bishitantenan por a hasi pregunta i papia ku e presentenan.
For di investigashon pa plan maestro
Durante e reunionnan, Direktiva di APC a splika dikon APC a invertí den e lugá spesial akí i kua ta e ambishon sosial tras di e desaroyo. E revitalisashon di sentro di siudat, un mihó ambiente pa biba, traha i pasa tempu, desaroyo sosioekonómiko i fortalesementu sostenibel di patrimonio ta sentral den esaki.
Despues, e arkitektonan Bart Akkerhuis i Lyongo Juliana a splika na e presentenan kon e plan maestro a haña forma. For di kompra na 2020, a kompletá vários investigashon, seshon ku gruponan di interes i diferente vershon di diseño. Entretantu, ROP a duna e plan maestro aprobashon di prinsipio i e ta forma e base pa sigui desaroyá e arkitektura.
E Heritage Impact Assessment (HIA), kondusí pa e instansia spesialisá i sertifiká Hylkema Erfgoed, tambe tabatin un papel importante den e splikashon. E HIA ta investigá tantu e posibel efektonan positivo komo negativo di e desaroyo riba e balornan di patrimonio i e Outstanding Universal Value di Willemstad komo Patrimonio Mundial di UNESCO. E evaluashon ta mustra ku e plan maestro ta trese mehorashon riba vários punto kompará ku e situashon aktual, entre otro ku restourashon di liñanan di bista, mihó aksesibilidat di Waterfort i un konekshon mas fuerte entre e sentro históriko di siudat i awa.
Mas espasio pa biba, traha i topa otro
E plan maestro ta basa riba añanan di análisis i investigashon di e arkitektonan. Nan no a mira solamente e edifisionan eksistente, sino tambe e struktura di sentro di siudat: e patronchinan di kaya, blòkinan di konstrukshon, masa i volúmen, i e manera ku edifisionan ta relashoná ku espasio públiko. Nan a investigá e karakterístikanan akí di Punda i sentro históriko di siudat i a usa nan komo un base importante pa e struktura espasial di e plan maestro.
E klima Karibense tambe tin un papel importante den esaki. Nan a investigá kuidadosamente e posishon i orientashon di e edifisionan, ku atenshon pa solo, bientu i sombra. Ademas, nan a wak kon por stimulá biba den aire liber i enkuentro sosial den espasio públiko. Uso di plasa, kaya i otro lugá pa hende topa otro pafó ta un parti natural di bida den konteksto Karibense. Nan a tradusí e prinsipionan akí den e manera ku e plan maestro ta organisá i posishoná e edifisionan. Mas informashon ta disponibel riba e wèpsait road2plaza.com.
E reunionnan no ta e final, sino un siguiente paso den e proseso. E plan maestro ta kla; awor ta sigui e elaborashon arkitektóniko. Den e fase ei tambe, patrimonio, espasio públiko, mas bèrdè i e importansia di Waterfort Plaza pa komunidat i futuro di Punda ta sigui risibí atenshon.
