WILLEMSTAD.- Ayera tardi e organisashon SOCAN ku ta un empresa Kanades spesialisá den maneho di derechi di outor a tene un presentashon na Kòrsou.
Abogado mr. David Kock a dirigí e presentashon huntu ku un representante di SOCAN.
E empresa tin 145 mil miembro i tin bou di su maneho un repertorio di 22.5 mion kansion.
E presentashon na Kòrsou ku a keda sostené pa AMAK a tuma lugá pa músiko, artistanan i tambe representante di radio emisoranan lokal. E públiko presente ayera tabata forma parti di músikonan, artistanan i un grupo chikí di representante di radio emisoranan lokal.
E plan di SOCAN ta pa salbaguardiá e derechi di outor, yega na un kompensashon pa e artista, negoshá ku radio emisoranan pa e pago di ‘royalties’. Ta kuminsá ku radio emisoranan pero e plan di SOCAN ta pa despues atende ku plantanan di televishon, diskotèk, negoshinan den e sektor di horeca i tur sobra ku ta hasi uso komersial di muzik.
RADIO
Via di un kontrakt ku un radio emisora lo mester yega na e pago di kompensashon, si no kumpli ku esaki nan lo mester stòp di toka e komposishonnan ku ta registrá. Dado kaso no kumpli ku e kontrakt lo entamá un proseso legal pa yega na e pago di kompensashon. Loke ta masha importante ta ku SOCAN lo no mantené nan mes na e protekshon di e artista lokal pero nan kontrakt ku radionan lokal lo ta tantu pa e músiko lokal komo esun internashonal.
Despues dje presentashon ayera a sigui un seshon di pregunta i diskushon riba e tema algu ku sigur lo bai sigui durante dje dianan ku ta sigui. E promé paso di SOCAN lo ta pa músiko i artistanan lokal inskribí nan mes serka e kompania. Kosto pa e artista pa loke ta trata e proseso aki ta ‘zero’ i segun splikashon e dil lo ta un efisiente pa e artista.
Riba foto nos por apresiá e representantenan di SOCAN huntu ku abogado, mr. David Kock i tambe parti di e públiko, músiko, artista i interesadonan ku a bishitá e presentashon.

LAGA UN KOMENTARIO

Please enter your comment!
Please enter your name here